Ortalyq jáne Shyǵys Eýropadaǵy qatty sý tasqynynan 16 adam qaza tapty

ASTANA. KAZINFORM — Ortalyq jáne Shyǵys Eýropada tolassyz jaýǵan jańbyr men sý tasqyny saldarynan qaza tapqandar sany 16 adamǵa jetti, taǵy birneshe adam iz-túzsiz joǵalǵan.

Eýropa bıligi Chehııa, Polsha men Avstrııada qaza bolǵan adamdar týraly habarlap, tabıǵı apatpen kúrestiń jalǵasyp jatqanyn eskertti.

Chehııa premer-mınıstri Petr Fıala halyqty «merler men órt sóndirýshilerdiń nusqaýlaryn oryndaýǵa» shaqyrdy. Onyń aıtýynsha, jeksenbi kúni keshke tótenshe jaǵdaılar qyzmeti 7 884 órtti sóndirdi, 119 myń úı sharýashylyǵy elektr qýatynsyz qaldy.

Fıala myrzanyń habarlaýynsha, el boıynsha kem degende 12 myń adam úıinen evakýatsııalanǵan, jańbyr eń kóp zardap shekken aýdandarda toqtaǵanymen, daýyl batysqa qaraı jyljyp, ózen deńgeıi kóterilýinen jaǵdaı basqalar úshin kúrdeli bolyp otyr. 

«Ókinishke qaraı, kóptegen adamdar úshin óte qıyn kúnder jalǵasyp jatyr. Eń qıyn jaǵdaı ońtústik Bogemııada qalyptasty. Ótinish, muqııat jáne jaýapty bolyńyzdar», — dedi Chehııa premer-mınıstri.

Túnde Morava ózeninde sý deńgeıiniń kóterilýine baılanysty el astanasy Pragadan shyǵysqa qaraı 230 shaqyrym jerde ornalasqan Chehııanyń Lıtovel qalasynyń shamamen 70%-y sý astynda qaldy. Saldarynan mektepter men medıtsınalyq mekemeler jabyldy.

Eldiń úshinshi iri qalasy Ostravada jylý jáne ystyq sýmen qamtamasyz etetin elektr stantsııasy jumysyn toqtatýǵa májbúr boldy. Krnov pen Cheskı-Teshınde myńdaǵan adam úılerinen evakýatsııalandy.

Opavada 56 myńǵa jýyq halyqtan 10 myńǵa deıin adam joǵary jerge kóshirýdi surady.

«Kútýge negiz joq», — dedi mer Tomash Navratıl. Ol Chehııanyń qoǵamdyq radıosyna jaǵdaıdyń «ǵasyr tasqyny» atalǵan 1997 jylǵy joıqyn sý tasqynynan da kúrdeli ekenin qosyp aıtty.