Ortalyq jáne Ońtústik Azııa elderi arasyndaǵy Termez dıalogynyń alǵashqy otyrysy Ózbekstanda ótedi

TAShKENT. KAZINFORM – 19-21 mamyr aralyǵynda Ózbekstanda «Beıbitshilik, dostyq pen órkendeýdiń ortaq keńistigin qurý» taqyrybynda Ortalyq jáne Ońtústik Azııa elderi arasyndaǵy ózara baılanys jónindegi Termez dıalogynyń birinshi otyrysy ótedi, dep habarlaıdy Kazinform agenttiginiń menshikti tilshisi.

Aýqymdy is-sharany Ózbekstannyń Strategııalyq jáne óńiraralyq zertteýler ınstıtýty, Syrtqy ister mınıstrligi men Saýda-ónerkásip palatasy uıymdastyryp otyr.

Termez dıalogyna Ortalyq jáne Ońtústik Azııa, Eýropa, TMD, AQSh pen Taıaý Shyǵys elderinen 200-ge jýyq sarapshy, halyqaralyq jáne óńirlik uıym ókilderi, ǵylymı-zertteý ortalyqtarynyń mamandary qatysady.

Olar Ortalyq jáne Ońtústik Azııanyń qazirgi óńiraralyq yntymaqtastyǵyn baǵamdap, baılanystardy nyǵaıtý múmkindigin izdestiredi.

Atap aıtqanda, qaýipsizdik, ornyqty damý, ekonomıkalyq ósim men qarjy uıymdarynyń mańyzyn arttyrý máseleleri qatysýshylardyń basty nazarynda bolmaq.

Іs-shara Ózbekstannyń Surhandarııa oblysyna qarasty Termez qalasyndaǵy «Termez» halyqaralyq saýda ortalyǵynda ótedi.

Qosa ketsek, bıyl 5 mamyrda Samarqand qalasynda ótýi tıis bolǵan «Ortalyq Azııa - Shyǵanaqtaǵy arab memleketteriniń yntymaqtastyǵy keńesiniń» ekinshi sammıti keıinge qaldyrylǵan edi.