Ortalyq jáne Ońtústik Azııa arasyndaǵy energetıkalyq kópir 2027 jyly iske qosylady
ASTANA. KAZINFORM — CASA-1000 energetıkalyq jobasynyń Aýǵanstan ýchaskesiniń qurylysy 2027 jyldyń kókteminde aıaqtalady, al kommertsııalyq paıdalaný sol jyldyń jazynda bastalady, dep habarlaıdy Kazinform agenttiginiń Dýshanbedegi menshikti tilshisi.
Tájikstannyń Energetıka jáne sý resýrstary mınıstrligi baspasóz qyzmetiniń habarlaýynsha, aımaqtyq jobanyń barysy 18-20 sáýir kúnderi Dýshanbede Da Afghanistan Breshna Sherkat (DABS) kompanııasynyń basshylyǵy, Dúnıejúzilik bank ókilderi jáne Kamani Engineering Corporation merdiger-kompanııasynyń qatysýymen talqylandy.
TR Energetıka mınıstrliginiń basshysy Daler Djýmanyń atap ótýinshe, CASA-1000 jobasyn iske asyrý aımaqtyq yntymaqtastyqty nyǵaıtý, qatysýshy elder arasyndaǵy senimdi arttyrý jáne taza elektr energııasyn eksporttaýdy qamtamasyz etý úshin strategııalyq mańyzǵa ıe.
Qurylys jumystary qazir Qyrǵyzstan, Tájikstan jáne Pákistanda tolyǵymen aıaqtaldy, al Aýǵanstanda jalǵasyp otyr.
— Osyǵan baılanysty Kamani Engineering Corporation kompanııasynyń ókilderi jańartylǵan josparǵa sáıkes aýǵan ýchaskesindegi jumystar 2027 jyldyń kókteminde aıaqtalatynyn, sodan keıin 2027 jyldyń jazynda jobany kommertsııalyq paıdalaný kezeńi bastalatynyn málimdedi, — dep habarlady TR Energetıka mınıstrligi.
Vedomstvo bul mańyzdy aımaqtyq jobanyń tolyq aıaqtalýy energetıka naryǵynyń damýyna, energetıkalyq qaýipsizdikti nyǵaıtýǵa jáne qatysýshy elder arasyndaǵy ekonomıkalyq yntymaqtastyqty keńeıtýge yqpal etetinin qosyp ótti.
Osyǵan deıin Qyrǵyzstan men Tájikstan sý máseleleri boıynsha yntymaqtastyqty nyǵaıtqanyn jazdyq.
