Ortalyq saılaý komıssııasynyń tóraǵasy Vınsent Pıket bastaǵan delegatsııamen kezdesti
ASTANA. KAZINFORM – Ortalyq saılaý komıssııasynyń tóraǵasy Nurlan Ábdirov EQYU Demokratııalyq ınstıtýttar jáne adam quqyqtary jónindegi bıýrosy (DIAQB) mıssııasynyń basshysy Vınsent Pıket bastaǵan delegatsııamen kezdesti. Kezdesýde Qazaqstanda alǵash ret ótetin Quryltaı depýtattarynyń saılaýyna daıyndyq barysy tanystyryldy.
Nurlan Ábdirovtiń aıtýynsha, mıssııa múshelerine konstıtýtsııalyq reformanyń negizgi jańalyqtary, Quryltaıdy qalyptastyrýdyń jańa úlgisi, jańartylǵan saılaý zańnamasy jáne saılaý naýqanynyń qazirgi kezeńi týraly aqparat berildi.
— 2026 jylǵy 15 naýryzda ótken respýblıkalyq referendýmda Qazaqstan Respýblıkasynyń Konstıtýtsııasy qabyldanyp, zań shyǵarýshy bıliktiń jańa modeli bekitildi. Konstıtýtsııalyq reformaǵa sáıkes Qazaqstan eki palataly Parlamentten proportsıonaldy ókildik júıesine negizdelgen bir palataly Quryltaıǵa kóshti. Al reformany iske asyrýǵa arnalǵan barlyq normatıvtik quqyqtyq aktiler bıylǵy 1 shildeden bastap kúshine endi, — dedi Nurlan Ábdirov.
Kezdesýde saılaýdy uıymdastyrý, saılaý komıssııalarynyń jumysyn úılestirý, olardyń múshelerin daıarlaý, saılaý protsesiniń ashyqtyǵyn qamtamasyz etý, saılaýshylardy aqparattandyrý, sondaı-aq qoǵamdyq jáne halyqaralyq baıqaýshylardyń qatysýyna qatysty máseleler talqylandy.
Nurlan Ábdirov Ortalyq saılaý komıssııasy halyqaralyq baıqaýshylardyń óz mindetin Qazaqstan zańnamasy men halyqaralyq mindettemelerge sáıkes atqarýyna barlyq qajetti jaǵdaı jasaıtynyn aıtty. Sonymen qatar EQYU DIAQB usynymdary saılaý júıesin odan ári jetildirý barysynda eskeriletinin jetkizdi.
Óz kezeginde Vınsent Pıket Qazaqstannyń EQYU keńistigindegi mańyzdy ári bedeldi seriktesterdiń biri ekenin atap ótti.
— Qazaqstanda alǵash ret ótetin Quryltaı depýtattarynyń saılaýyn baıqaýǵa shaqyrǵandaryńyz úshin alǵysymyzdy bildiremiz. Qazaqstan qazir ınstıtýtsıonaldyq jáne zańnamalyq jańǵyrýdyń mańyzdy kezeńinen ótip jatyr. Sondyqtan bul saılaýdy baqylaý bizdiń mıssııa úshin erekshe mańyzdy. Biz Qazaqstanmen qalyptasqan seriktestikti jáne Ortalyq saılaý komıssııasymen ornyqqan ashyq ári syndarly dıalogty joǵary baǵalaımyz, - dedi Vınsent Pıket.
Kezdesý qorytyndysynda Ortalyq saılaý komıssııasy Quryltaı depýtattarynyń saılaýy Qazaqstan zańnamasyna sáıkes ótkiziletinin jáne saılaý protsesine qatysýshylardyń barlyǵyna teń jaǵdaı jasalatynyn málimdedi.
Buǵan deıin Quryltaı saılaýyna daıyndyqtyń kúntizbelik jospary tanystyrylǵanyn jazǵan edik.
