Ortalyq referendým komıssııasynda EQYU DIAQB ókilderimen kezdesý ótti
ASTANA. KAZINFORM – Referendýmda daýys berý quqyǵy bar 12 416 759 azamat tizimge engizildi. Bul týraly OSK baspasóz qyzmeti habarlady.
Ortalyq referendým komıssııasy tóraǵasynyń orynbasary Muhtar Erman EQYU DIAQB mıssııasynyń qajettilikterdi baǵalaý jónindegi ókilderimen — EQYU DIAQB Saılaý departamenti basshysynyń orynbasary Ýlvı Ahýndlý jáne DIAQB saılaý máseleleri jónindegi keńesshisi Elena Kovalevamen kezdesti.
Muhtar Erman 2026 jylǵy 15 naýryzda ótetin respýblıkalyq referendýmdy daıyndaý men ótkizý jumystarynyń barysy týraly aqparat berdi. Referendým ýchaskeleri ınfraqurylymyń ózektendirý jumystary aıaqtaldy.
— Referendýmda daýys berý quqyǵy bar 12 416 759 azamat tizimderge engizildi. Azamattardyń tizimderge engizilgenin tekserý boıynsha aqparattyq servısterdiń jumys isteýi uıymdastyrylady. Dástúr boıynsha daýys berý kúni eki onlaın-servıs jumys isteıdi: azamattardyń daýys berýshiler tiziminde bar-joǵyn tekserý jáne daýys berý kúni ýaqytsha tirkeý boıynsha, — delingen OSK habarlamasynda.
Azamattardy referendým ótkizý barysy týraly barlyq kommýnıkatsııa arnasyn paıdalana otyryp, sonyń ishinde daýys berýshilerge QR kody arqyly referendým týraly tolyq aqparat qamtylǵan jeke shaqyrý bıletterin tabystaý arqyly keń aýqymdy aqparattandyrý júrgizilip jatyr.
Ortalyq referendým komıssııasy referendýmdy ótkizý kezinde azamattardyń, onyń ishinde múgedektigi bar adamdardyń elektoraldy quqyqtaryn júzege asyrýyna jaǵdaı jasaýǵa basa nazar aýdarady.
Sonymen qatar, referendým ýchaskelerinde akkredıttelgen qoǵamdyq birlestikter, kommertsııalyq emes uıymdary jáne buqaralyq aqparat quraldary ókilderiniń qyzmeti úshin zańnamada kózdelgen jaǵdaılar jasalyp jatyr.
EQYU DIAQB mıssııasynyń ókilderi respýblıkalyq referendýmdy baıqaý mıssııasyn júzege asyrý perspektıvalaryn atap ótti.
Kezdesý barysynda ORK tóraǵasynyń orynbasary EQYU DIAQB ókilderiniń respýblıkalyq referendýmdy ótkizý men daıyndyq jumystaryna qatysty barlyq suraqtaryna jaýap berdi.
Aıta ketelik Bas prokýratýra referendýmǵa qatysty saýalnama júrgizý tártibin túsindirgen edi.