Referendýmnyń túpkilikti qorytyndysy shyqty
ASTANA. KAZINFORM — Búgin Ortalyq referendým komıssııasy 15 naýryzda ótken jańa Konstıtýtsııa jobasyna qatysty referendýmnyń túpkilikti qorytyndysyn shyǵardy.
— Referendýmǵa qatysýǵa quqyǵy bar respýblıka azamattarynyń jalpy sany 12 mln 482 myń 613 adam. Daýys berýge qatysqan azamattardyń sany — 9 mln 127 myń 192 adamdy nemese referendýmǵa qatysýǵa quqyǵy bar azamattar sanynyń 73,12 paıyzyn qurady, — dedi komıssııa tóraǵasy Nurlan Ábdirov.
Onyń aıtýynsha, jańa Konstıtýtsııany qabyldaý týraly máseleniń oń sheshimin jaqtap, daýys bergen azamattar sany elimizdiń barlyq óńirinde daýys berýge qatysqan 7 mln 954 myń 666 adam nemese 87,15 paıyz boldy.
— Referendýmǵa qoıylǵan máseleni qabyldamaǵan azamattar sany — 898 099 adam. Jaýaptardyń eki nusqasy da tańdalǵan, ıaǵnı jaramdy dep tanylǵan, biraq daýystardy sanaý kezinde esepke alynbaıtyn bıýlletender sany — 127 868. Belgilenbegen úlgidegi sondaı aq daýys bergenderdiń erik bildirýin aıqyndaý múmkin emes jáne jaramsyz dep tanylǵan bıýlletender sany — 146 558. Respýblıkalyq referendým týraly zańnamanyń normalaryna sáıkes, eger referendýmǵa qatysý quqyǵy bar azamattardyń jartysynan kóbi daýys berýge qatysqan bolsa, referendým ótkizilgen dep sanalady, — dedi Nurlan Ábdirov.
Aıta keteıik, keshe Ortalyq referendým ortalyq komıssııasy respýblıkalyq referendýmdaǵy daýys berýdiń aldyn ala nátıjelerin jarııalady.
Oǵan sáıkes, daýys berýge qatysqan azamattardyń sany — 9 mln 127 myń 197 adamdy nemese referendýmǵa qatysýǵa quqyǵy bar azamattar sanynyń 73,12 paıyzyn qurady. Osylaısha jańa Konstıtýtsııany qabyldaý týraly máseleniń oń sheshimin jaqtap, daýys bergen azamattar sany elimizdiń barlyq óńirinde daýys berýge qatysqan 7 mln 954 myń 667 adam nemese 87,15 paıyz boldy.
