Ortalyq referendým komıssııasy qazaqstandyqtarǵa úndeý jasady
ASTANA. KAZINFORM – Ortalyq referendým komıssııasy respýblıkalyq referendýmǵa qatysý tártibi boıynsha úndeý jarııalap, azamattardy 2026 jylǵy 15 naýryzda ótetin daýys berýge belsendi qatysýǵa shaqyrdy.
Komıssııa málimetinshe, azamattyń referendýmǵa qatysý quqyǵyn iske asyrýdyń basty kepili – ony respýblıkalyq referendýmǵa qatysýǵa quqyǵy bar azamattar tizimine engizý. Tizimderdi jergilikti atqarýshy organdar daýys berý ýchaskesiniń aýmaǵyndaǵy turaqty tirkeý derekterine sáıkes qalyptastyrady. Ýaqytsha tirkelgen azamattar tıisti ótinish negizinde engiziledi.
- Daýys berý ýchaskeleri men olardyń shekaralary týraly aqparatty ákimder 2026 jylǵy 21 aqpanǵa deıin jarııalaıdy. Azamattar óz ýchaskesin jáne tizimge engizilgen-engizilmegenin tirkelgen jeri boıynsha jergilikti atqarýshy organǵa júginý arqyly teksere alady. Eger azamat tizimnen tabylmasa, ákimdikke ótinish berýge quqyly, - delingen úndeýde.
Sondaı-aq 2026 jylǵy 27 aqpannan bastap ár azamat óz daýys berý ýchaskesinde tizimdegi derekterin naqtylaý múmkindigine ıe bolady. Qajet bolǵan jaǵdaıda ózgerister engizý úshin ýchaskelik referendým komıssııasyna júginýge bolady.
Ortalyq referendým komıssııasy azamattardy azamattyq jaýapkershilik tanytyp, 15 naýryzda ótetin respýblıkalyq referendýmǵa qatysýǵa shaqyrdy.
Aıta keteıik, referendýmdy ázirleý men ótkizý jónindegi negizgi is-sharalardyń jospary bekitildi.