Ortalyq memlekettik organdar básekelestik týraly zań talaptaryn oryndamaıdy - Básekelestikti damytý agentigi
ASTANA. KAZINFORM - Básekelestikti qorǵaý jáne damytý agenttigi básekelestikti shekteýge nemese joıýǵa ákep soqtyrǵan nemese ákep soqtyrýy múmkin memlekettik organdar tarapynan básekelestikke qarsy is-qımyldardyń jolyn kesý jónindegi jumysty jalǵastyrýda.
Memlekettik organdardyń ekonomıkanyń tıisti salalarynda memlekettik saıasatty iske asyrý kezinde básekelestikti damytý jóninde sharalar qabyldaý jáne básekelestikke teris áser etetin is-áreketter (áreketsizdikter) jasamaý mindetine qaramastan, olardyń keıbireýleri Kásipkerlik kodekstiń normalaryn elemeýdi jalǵastyrýda.
QR Tsıfrlyq damý, ınnovatsııalar jáne aeroǵarysh ónerkásibi mınıstrligi óz kezeginde aqparattandyrý nysandaryn ıntegratsııalaý qaǵıdalarynda keminde 100 000 paıdalanýshynyń bolýy týraly talapty belgileý arqyly jańa jobalar úshin «tsıfrlyq qujattar» servısine qoljetimdilikti shektedi. Osyǵan baılanysty Agenttik osy normany alyp tastaý týraly uıǵarym shyǵardy, ol sátti oryndaldy.
Sonymen qatar, QR Ónerkásip jáne qurylys mınıstrligine qatysty básekelestikti shekteý jáne Jer qoınaýy qoryn memlekettik basqarý baǵdarlamasyna Jer qoınaýy ýchaskelerin qosýdan bas tartý jáne qol qoıý bonýstarynyń joǵary mólsherimen aýktsıondar ótkizbeý arqyly belgili bir naryq sýbektisine artyqshylyq berý faktisi boıynsha tergeý aıaqtaldy.
Jalpy alǵanda, básekelestikke qarsy is-qımyl belgileri boıynsha 2023 jyly 71 habarlama shyǵaryldy, 21 tergeý aıaqtaldy.
Ortalyq memlekettik organdar, atap aıtqanda ótken jyly monopolııaǵa qarsy organ qarjy, densaýlyq saqtaý, ónerkásip jáne qurylys mınıstrlikteriniń qyzmetin pysyqtaǵan.
