Ortalyq Qytaıdaǵy mektep jataqhanasyndaǵy órtten 13 adam qaza boldy

ChJENChJOÝ. KAZINFORM – Ortalyq Qytaıdyń Henan provıntsııasynda ornalasqan Nanıan qalasy Fenchan ýezinde juma kúni túnde bolǵan órtten 13 adamnyń mert bolǵany rastaldy, dep málim etti jergilikti bılik ókilderi.

Bul týraly Qytaıdyń Sınhýa agenttigi habarlady.

Agenttiktiń málimetinshe, juma kúni saǵat 23:00 kezinde órtpen kúres qyzmetine ıAnshanpý aýylyndaǵy Intsaı mektebiniń jataqhanasynan órt shyqqany týraly habar túsken. Qutqarýshylar birden oqıǵa ornyna jetip, órt 23:38-de sóndirildi.

Bir adam jaraqat alyp, qazirgi tańda aýrýhanada em alyp jatyr, jaǵdaıy turaqty. Osy ýaqytta órttiń sebep-saldaryn anyqtaý jumystary júrip jatyr.