Ortalyq Qazaqstanda 500 megavattyq jel elektr stansasynyń qurylysy bastaldy
ASTANA. KAZINFORM - Qaraǵandy oblysynda qýaty 500 MVt jel elektr stansasynyń (JES) qurylysy resmı túrde bastaldy.
QR Energetıka mınıstrligi baspasóz qyzmetiniń habarlaýynsha, jobany China Energy International Group kompanııasy Samuryq-Energomen birlesip, Qazaqstan men Qytaı arasyndaǵy úkimetaralyq kelisim aıasynda iske asyryp jatyr.
Jobaǵa 645 mln AQSh dollary kóleminde ınvestıtsııa tartylmaq. JES-tiń jyldyq elektr energııasyn óndirý kólemi 1,6 mlrd kVt·saǵ «jasyl» energııany quraıdy. Nysandy paıdalanýǵa berý 2029 jyldyń birinshi toqsanyna josparlanǵan.
Jobany iske asyrý jyl saıyn shamamen 1,3 mln tonna kómirqyshqyl gazynyń shyǵarylýyn qysqartýǵa múmkindik beredi, bul aıtarlyqtaı ekologııalyq áser beredi.
Jalpy alǵanda, qazirgi tańda energııa saqtaý júıelerimen jabdyqtalǵan jel elektr stantsııalary boıynsha halyqaralyq áriptestikti nyǵaıtýǵa erekshe nazar aýdarylyp otyr.
Jambyl oblysynda frantsýz kompanııasy TotalEnergies salatyn qýaty 1 GVt jel stantsııasynyń qurylysy bastaldy, al Pavlodar oblysynda State Power Investment Corporation kompanııasymen birlesip osyndaı qýattaǵy 1 GVt jobany iske asyrylyp jatyr.
Osyǵan deıin Oljas Bektenov Túrkistan oblysynda salynyp jatqan elektr stansasynyń qurylysyn teksergen bolatyn.
