Ortalyq Eýrazııadaǵy basshylarǵa arnalǵan «AI Leaders 2026» baǵdarlamasy túlekterin marapattaý rásimi ótti

Baǵdarlama Qazaqstandaǵy Jasandy ıntellekt jylynyń negizgi jobalarynyń birine aınaldy. Ol álemniń 9 elinen (sonyń ishinde Ázerbaıjan, Qazaqstan, Qyrǵyzstan, Ózbekstan, Tájikstan, Túrkııa, Katar, BÁÁ jáne Mońǵolııa) 150-den astam uıymnyń 800-den astam basshysy men mamanynyń basyn qosty. Qatysýshylar arasynda memlekettik organdardyń, ulttyq holdıngterdiń, qarjy ınstıtýttarynyń, tehnologııalyq kompanııalardyń, ónerkásiptik kásiporyndar men bilim berý uıymdarynyń ókilderi bar.

Saltanatty is-shara aıasynda Premer-Mınıstrdiń orynbasary - Jasandy ıntellekt jáne tsıfrlyq damý mınıstri Jaslan Mádıev  qatysýshylardy quttyqtady. «Silkroad Innovation Hub» negizin qalaýshy jáne bas dırektory Áset Ábdýalıev «AI Leaders 2026» baǵdarlamasynyń basty nátıjelerimen tanystyrdy. OpenAI-dyń ekonomıka salasyndaǵy strategi Reıchel Braýn JI-diń ekonomıkalyq damýdaǵy róli týraly dáris oqydy. Sondaı-aq is-sharaǵa OpenAI-dyń «Memleketterge arnalǵan bilim berý» halyqaralyq baǵytynyń jetekshisi Valerı Fokke qatysty. Baǵdarlamanyń bólek bir blogy qatysýshylardyń óz uıymdary úshin ázirlegen JI-strategııalarynyń tanystyrylymyna arnaldy.

- Jasandy ıntellekt jahandyq básekege qabilettiliktiń negizgi faktorlarynyń birine aınalyp keledi. Biraq tehnologııalardyń ózi ǵana ekonomıka men memlekettik basqarýdy ózgerte almaıdy. Transformatsııanyń basty qozǵaýshy kúshi - jańa bilimdi tájirıbede qoldana alatyn jáne basqarýshylyq sheshimder qabyldaýǵa qabiletti adamdar, myqty komandalar. «AI Leaders 2026» baǵdarlamasyna jekelegen mamandardyń emes, memlekettik organdar men kompanııalardyń tutas komandalarynyń qatysqany mańyzdy. Bul jergilikti eksperımentterden JI-di naqty protsesterge júıeli túrde engizýge kóshýge múmkindik beredi. Alynǵan bilim men álemdik tájirıbege qol jetkizý jańa jobalardyń negizine aınalyp, Memleket basshysynyń tsıfrlandyrý jáne jasandy ıntellektini damytý salasynda qoıǵan mindetterin sapaly iske asyrýǵa kómektesetinine senimdimin, - dedi Premer-Mınıstr orynbasary - Jasandy ıntellekt jáne tsıfrlyq damý mınıstri Jaslan Mádıev.

«AI Leaders» baǵdarlamasynyń akademııalyq jetekshisi Stanford HAI professory, JI boıynsha álemdik basty bestsellerdiń avtory, Google Research-tiń eks-dırektory jáne QR Prezıdenti janyndaǵy JI damytý jónindegi sarapshylyq keńestiń qazirgi múshesi Pıter Norvıg boldy. Onyń jetekshiligimen oqý materıaldary bizdiń óńirdiń erekshelikterine barynsha beıimdeldi. Onymen birge baǵdarlamaǵa jasandy ıntellekt salasyndaǵy 15-ten astam halyqaralyq sarapshy, sonyń ishinde Sendı Pentland, Maıkl Bernstaın, Dııı ıAng jáne Maıkel Kohenderfer qatysty.

Segiz aptalyq oqý barysynda qatysýshylar Stanford University HAI dáristerin, OpenAI Academy tájirıbelik sabaqtaryn, salalyq vorkshoptar men strategııalyq keńes alýlardy qamtıtyn 45 saǵattan astam bilim berý baǵdarlamasynan ótti. Jalpy alǵanda, óz uıymdaryna JI engizý boıynsha 240-tan astam strategııalyq sessııa jáne 120 saǵattan astam jeke mentorlyq kezdesýler ótkizildi.

- Qazaqstan qysqa merzim ishinde jasandy ıntellektti engizý boıynsha óńirlik kóshbasshylardyń birine aınaldy jáne JI-di memlekettik ınstıtýttar men bıznes jumysyna júıeli túrde kiriktirip keledi. Bizdiń zertteýlerimiz JI-di qoldanýdan eń kóp tıimdilikti bul tehnologııalardy aýqymdy mindetter men protsesterde paıdalanatyn uıymdar ekenin kórsetip otyr. AI Leaders baǵdarlamasynyń túlekteri óz jumysynda ozyq álemdik bilim men tájirıbeni qoldanýǵa jáne Qazaqstanda JI-di odan ári damytýǵa úles qosýǵa biregeı múmkindik alady, - dedi OpenAI-dyń ekonomıka salasyndaǵy strategi Reıchel Braýn.

Baǵdarlamaǵa Stanford University HAI, OpenAI Academy jáne Silkroad Innovation Hub-tan bólek, CAYU jáne Lovable kompanııalary seriktes boldy. Bank sektory, memlekettik basqarý, ónerkásip jáne basqa da salalar úshin JI-agentterin ázirleý jáne engizý jónindegi vorkshoptar arqyly jasandy ıntellektti tájirıbelik qoldanýǵa erekshe nazar aýdaryldy.

«Silkroad Innovation Hub» negizin qalaýshy jáne bas dırektory Áset Ábdýalıev baǵdarlamanyń mańyzyn atap ótti.

- Buny biz «AI Leaders» baǵdarlamasyn jaı ǵana bilim berý jobasy emes, tsıfrlyq ekonomıka kóshbasshylarynyń jańa býynyn qalyptastyrý platformasy retinde qurdyq. Ortalyq Eýrazııa úshin bolashaqty aıqyndaıtyn álemdik saraptama ortalyqtary men tehnologııalarǵa tikeleı qol jetkizý óte mańyzdy. Búgin biz osy jumystyń nátıjesin kórip otyrmyz: qatysýshylar ázirlegen 100-den astam JI-strategııasy, óz uıymdaryna jasandy ıntellektti engizýge daıyn basshylar jáne eń bastysy - Ortalyq Eýrazııadaǵy JI-transformatsııasy kóshbasshylarynyń eń iri qoǵamdastyǵynyń qurylýy. Biz úshin Astanadaǵy túlekterdi shyǵarý rásimi - bul sońy emes, uzaq merzimdi jobalardyń bastaýy. Almatyda alǵashqy AI Community Meetup ótti, al jaqyn arada mundaı is-sharalar Tashkent, Dýshanbe jáne Doha qalalarynda uıymdastyrylady. Biz bıznes, memleket, ýnıversıtetter men tehnologııalyq kompanııalar arasyndaǵy turaqty ózara is-qımyl platformasyn jasap jatyrmyz. Dál osyndaı qoǵamdastyqtar ınnovatsııalardy damytý men tájirıbe almasýdyń negizine aınalady, - dedi ol.

Baǵdarlama aıaqtalǵannan keıin qatysýshylar Stanford University HAI jáne OpenAI Academy sertıfıkattaryn alyp, Ortalyq Eýrazııada tsıfrlyq transformatsııamen jáne jasandy ıntellektti engizýmen aınalysatyn basshylardyń eń iri kásibı qoǵamdastyǵy - «AI Leaders Community» múshesi atandy.

Aıta keteıik, Qarýly Kúshterde ushqyshsyz júıeler men jasandy ıntellekt oqytylady.