Ortalyq barlaý basqarmasy Venesýelada jasyryn operatsııa júrgizýge ruqsat aldy
ASTANA.KAZINFORM - AQSh prezıdenti Donald Tramp Ortalyq barlaý basqarmasyna Venesýelada jasyryn operatsııa júrgizýge ruqsat berdi. Sondaı-aq, esirtki kartelderine teńizde ǵana emes, qurlyqta da soqqy berý múmkindigi qarastyryldy, dep habarlaıdy VVS.
VVS-diń habarlaýynsha, sońǵy aptalarda AQSh áskeri Karıb teńizinde esirtki tasymaldady degen kúdikke ilingen kemelerge keminde bes soqqy jasap, 27 adam qaza tapqan. BUU-nyń adam quqyqtary jónindegi sarapshylary bul shabýyldardy «sotsyz óltirý» dep aıyptady.
Sársenbide Aq úıde sóılegen Tramp jýrnalısterge onyń ákimshiligi «jerdegi operatsııalar múmkindigin qarastyryp jatqanyn» aıtty.
New York Times aqparat kózderine silteme jasaı otyryp, Tramp Ortalyq barlaý basqarmasyna Venesýeladaǵy operatsııalardy aýqymdy áskerı operatsııanyń bóligi retinde júrgizýge ruqsat bergenin habarlady.
«Barlaý basqarmasyna nege Venesýelaǵa barýǵa ruqsat berdińiz?» degen jýrnalıst saýalyna Tramp: «Men eki sebep boıynsha ruqsat berdim», - dep jaýap berdi, - Birinshiden olar túrmelerin bosatyp, olardy (tutqyndardy) AQSh-qa jóneltti... Olar munda shekara asyp keldi».
- Ekinshisine esirtki sebep. Bizge esirtkiniń kóp mólsheri Venesýeladan keledi, al sol venesýelalyq esirtkilerdiń kóbi teńiz arqyly keledi. Biz qazir teńizdi baqylaıtyndyqtan, qurlyq jóneltilimderin qarastyryp jatyrmyz, - dedi AQSh prezıdenti.
Amerıka prezıdenti birneshe ret Venesýelany ólimge ákeletin fentanıl esirtkisi saýdasynyń tranzıttik núktesi dep atady. Alaıda resmı derekterge sáıkes, Meksıka AQSh-taǵy fentanıldiń negizgi kózi bolyp sanalady.
Sársenbi kúni Venesýela úkimeti Tramptyń Ortalyq barlaý basqarmasyna elde jasyryn operatsııa júrgizýine ruqsat berý týraly málimdemesin aıyptap, ony halyqaralyq quqyq pen BUU Jarǵysyn buzý dep atady.
Reuters agenttiginiń habarlaýynsha, Venesýela úkimetiniń málimdemesinde AQSh áreketi Venesýelanyń munaı resýrsyn basyp alýdy kózdeıtin rejımdi ózgertý operatsııasyn zańdastyrýǵa baǵyttalǵan.
Biz buǵan deıin AQSh Venesýela jaǵalaýynda esirtki tasymaldaýshylardyń kemesine soqqy jasaǵanyn habarlaǵan edik.