Ortalyq Azııanyń jáne Qytaıdyń BAQ ókilderi qazaqstandyq kásiporyndardy aralady
ASTANA. KAZINFORM – Ortalyq Azııa-Qytaı medıasynyń «Bir beldeý, bir jol» bastamasy aıasyndaǵy birlesken baspasóz týry máresine jetti.
Qytaılyq «Jenmın jıbao» gazetiniń uıymdastyrýymen ótken baspasóz týryna Qazaqstan, Qyrǵyzstan, Ózbekstan, Tájikstan jáne Túrkimenstan BAQ ókilderi qatysty. Sonymen qatar is-sharada «Jenmın jıbao» gazetiniń halqaralyq bólim jýrnalısteri de boldy.
Bir aptaǵa jalǵasqan issaparda Ortalyq Azııa jáne «Jenmın jıbao» gazetiniń jýrnalısteri Qazaqstandaǵy qytaılyq ınvestıtsııa salynǵan jobalardy aralap, jumys barysymen tanysyp qaıtty. Atap aıtqanda, BAQ ókilderi eń áýeli Almaty qalasynda ornalasqan «Qazpost – YTO» JShS suryptaý ortalyǵyna at basyn tiredi.
Ekskýrcııa kezinde tájikstandyq áriptesimiz Anýshervon Rasýlov óz elinde osyndaı ortalyqtyń ashylǵanyn qalaıtynyn jetkizdi.
– Qazirgi tańda elimizde ınternet saýdasy jaqsy damyǵan. Óz basym qytaılyq elektrondy saýda platformasynan qajetti nárselerimdi alamyn. Qazaqstanǵa taýarlar jyldam jetkiziledi eken. Al osyndaı zamanaýı ortalyq jumys ónimdiligin arttyryp qana qoımaı, halyqqa barynsha sapaly jáne yńǵaıly qyzmet kórsetedi eken, - dedi ol.
Aıta keterligi, Memleket basshysy Qasym-Jomart Toqaevtyń 2023 jyly Qytaıǵa resmı sapary aıasynda «Qazposhta» AQ men YTO Express Group arasyndaǵy yntymaqtastyq týraly kelisimge qol qoıdy. Sonymen qatar 2024 jyly 2 shilde kúni elordada ótken Qazaqstan-Qytaı iskerlik keńesiniń jetinshi otyrysynda «Qazposhta» AQ jáne YTO Express birlesken kásipornynyń quryltaıshylyq shartyna qol qoıyp, «Qazpost – YTO» JShS jumysyn bastady. Yntymaqtastyq aıasynda «Qazposhta» AQ-nyń Almaty qalasyndaǵy suryptaý ortalyǵy jańǵyrtylyp, jańa tehnıkalarmen jabdyqtalǵan.
Ortalyq Azııa jáne Qytaı BAQ ókilderi Mańǵystaý oblysyndaǵy «Qarajanbas» ken ornyndaǵy ilespe qabat sýyn tushytý zaýyty jáne Caspi Bitum zaýyty jumysymen tanysyp qaıtty.
Ózbekstandyq jýrnalıst Abdývohıd Achılov «Qarajanbas» ilespe qabat sýyn tushytý zaýytynyń munaı-gaz salasyndaǵy mańyzdylyǵyn atap ótti.
– Meniń oıymsha, zaýyt jumysy munaı óndirý jáne ekologııalyq ortany qorǵaýda óte mańyzdy. Mańǵystaý obylysy tushy sýǵa óte muqtaj ekenin baıqadym. Al munaı óndirý salasynda óndiristik sý kóp mólsherde qajet bolyp otyr. Sol sebepti, jerasty sýyn tazalap, qaıta paıdalaný durys sheshim, - dedi ol.
Zaýyt ókilderiniń aıtýynsha, nysannyń aýdany – 36 000 sharshy metr, óndiristik qýaty kúnine – 17 000 tekshe metr. Qazirgi ýaqytta bul Qazaqstandaǵy munaı ken ornyndaǵy eń iri joba sanalady. Synaq rejıminde iske qosylǵannan bastap búgingi kúnge deıin zaýytta 10 mıllıon tekshe metr sý tushytyldy.
Sondaı-aq baspasóz týry Soltústik Qazaqstan obylysynyń Taıynsha aýdanynda ornalasqan Memolux JShS kásipornynda jalǵasty.
Kásiporyn qazirgi ýaqytta qytaılyq «Sıan Aı Tszıýı» korporatsııasymen birlesip bıdaıdy tereń óńdeý jobasyn iske asyryp jatyr. Qazirgi ýaqytta, zaýyt jylyna 200 myń tonna un jáne 300 myń tonna jemshóp uny, 20 myń tonna kespe ónimderin óndiredi.
«Sıan Aı Tszıýı» korporatsııasynyń Qazaqstandaǵy bas dırektory Fan Lýnfeıdiń aıtýynsha, qytaılyq naryqta Qazaqstanda óndirilgen «jasyl» aýyl sharýashylyǵy ónimderine suranys joǵary.
– Biz barlyq ónimimizdi Qytaı naryǵyna baǵyttap otyrmyz. Qytaı halqy un ónimderin kóp tutynady. Sol sebepti un ónimderiniń sapasyna jaqsy kóńil bóledi. Al biz qazaqstandyq seriktesterimizben birlesip, joǵary sapadaǵy ónimder óndirip jatyrmyz. Qytaı naryǵyndaǵy suranysymyz óte jaqsy, - dedi bas dırektor.
Sapar aıasynda BAQ ókilderi Saran qalasyndaǵy Yutong jolaýshylar avtobýsyn shyǵaratyn QazTehna zaýytyna bardy. Saran qalasynyń ákimi qalanyń damý josparymen tanystyryp, Qytaı ınvestıtsıasynyń mańyzdylyǵyna toqtaldy.
Al Ózbekstan jáne Qyrǵyzstan jýrnalısteri QazTehna zaýytynyń óz elderine Yutong jolaýshylar avtobýsyn eksporttaý múmkindigin surady.
Baspasóz týrynyń sońǵy kúninde Ortalyq Azııa jáne Qytaı jýrnalısteri
Almaty qalasynyń kórikti jerlerine saıahat jasap, Shymbulaq pen Qaıyńdy kóliniń ásem kórinisin tamashalady.
«Jenmın jıbao» gazeti halqaralyq bóliminiń basshysy Ý Ledjıýn Ortalyq Azııa men Qytaı arasyndaǵy qarym-qatynastyń qarqyndy damyp jatqanyna toqtaldy.
– Bul gazetimizdiń Ortalyq Azııa elderiniń BAQ ókilderiniń qatysýymen ótkizip jatqan alǵashqy baspasóz týry. Biz Ortalyq Azııa elderindegi áriptesterimizdiń sharamyzǵa belsendi qatysyp jatqanyna shyn júrketen qýanyshtymyz. «Bir beldeý, bir jol» bastamasy aıasynda elderimiz arasyndaǵy baılanys qarqyndy damyp jatyr. Aqparat salasynyń qyzymetkeri retinde biz osy jetistikterdi halyqqa jetkizýimiz kerek dep oılaımyn, - dedi ol.
Sondaı-aq qytaılyq basylym basshysy ne úshin Qazaqstanda baspasóz týryn uıymdastyrǵanyn aıtty.
– Qazaqstan – «Bir beldeý, bir jol» bastamasynyń eń belsendi jáne mańyzdy qatysýshysy. Qazirgi tańda eki el kásiporyndary tabysty yntymaqtastyq ornatty. Ekinshi kezekti Qytaı – Ortalyq Azııa sammıtinde osy jetistikterdi óz kózimizben kórsek degen basty maqsat boldy, - dep qortyndylady Ý Ledjıýn hanym.
Osyǵan deıin habarlaǵanymyzdaı, Qazaqstan jáne Qytaı jýrnalısteriniń birlesken baspasóz týry ótti.