Ortalyq Azııanyń Shyǵys pen Batys arasyndaǵy tranzıt torabyna aınalýǵa múmkindigi bar – Prezıdent
SAMARQAND. KAZINFORM – «Ortalyq Azııa - Eýropa Odaǵy» sammıti barysynda Memleket basshysy Qasym-Jomart Toqaev Orta dálizdi damytý arqyly tranzıtik ortalyqqa aınalý múmkindigi týatynyn málimdedi, dep habarlaıdy Kazinform agenttiginiń menshikti tilshisi Álıhan Asqar.

— Ortalyq Azııanyń Shyǵys pen Batys arasynda tıimdi jetkizý tizbegi qalyptasqan tranzıt torabyna aınalýǵa múmkindigi bar. Keıingi birneshe jylda Qazaqstan Transkaspıı halyqaralyq kólik dálizin belsendi damytyp keledi. Byltyr Transkaspıı halyqaralyq kólik dálizimen konteıner arqyly tasymaldanǵan júk kólemi 62% artyp, 4,5 mln tonnaǵa jetti. 2027 jylǵa qaraı júk kólemin 10 mln tonnaǵa deıin jetkizý kózdelip otyr, - dedi Prezıdent.
Osy oraıda, Qasym-Jomart Toqaev Eýropa Odaǵynyń Ortalyq Azııa óńirindegi ornyqty kólik baılanysynyń damýyna oń septigin tıgizip otyrǵan Global Gateway strategııasyna qoldaý bildirdi.
— Taıaýda Eýropa ınvestıtsııalyq banki men Qazaqstan damý banki kólik ınfroqurylymyn damytý úshin quny 200 mln eýro bolatyn kelismge qol qoıdy. Orta dálizdi damytý boıynsha Eýropa Odaǵymen birlesip iske qosylǵan úılestirý platformasyn da atap ótkim keledi, - dep málim etti Prezıdent.

Aıta keteıik, búgin Ózbekstannyń Samarqand qalasynda «Ortalyq Azııa — Eýropa Odaǵy» formatyndaǵy alǵashqy sammıti ótti.
Buryn habarlaǵanymyzdaı, keshe Prezıdent Qasym-Jomart Toqaev Ózbekstanǵa jumys saparymen keldi. Onyń barysynda Memleket basshysy Eýropalyq keńes prezıdenti Antonıý Koshta, Eýropalyq komıssııa prezıdenti Ýrsýla fon der Lıaıen, Eýropalyq qaıta qurý jáne damý bankiniń prezıdenti Odıl Reno-Bassomen ekijaqty kezdesýler ótkizdi.