Ortalyq Azııanyń organıkalyq ónimderi Qytaı naryǵynda joǵary baǵalanady — Іskerlik keńes
ASTANA. KAZINFORM — Ortalyq Azııa elderi Qytaı naryǵyna organıkalyq aýylsharýashylyq ónim eksportyn belsendi ári jan-jaqty túrde júrgizip otyr. Bul týraly Premer-mınıstrdiń orynbasary — ulttyq ekonomıka mınıstri Serik Jumanǵarın elordada «Ortalyq Azııa — Qytaı» iskerlik keńesiniń ekinshi otyrysynda aıtty.
− Ortalyq Azııa — álemde sýarmaly aýyl sharýashylyǵyn damytatyn negizgi aımaq. Búgingi tańda óńir elderi Qytaı naryǵyna organıkalyq aýylsharýashylyq ónim eksportyn belsendi ári jan-jaqty túrde júrgizip otyr. Qazaqstannan shubat, Ózbekstannan shıe, Tájikstannan keptirilgen jemister, Qyrǵyzstannan bal, Túrikmenstannan maqta Qytaı naryǵynda jıi paıda bolyp, tutynýshylar arasynda joǵary baǵalanyp keledi, − dedi Serik Jumanǵarın iskerlik keńestiń ashylýynda.
Mınıstrdiń aıtýynsha, Ortalyq Azııa men Qytaı arasyndaǵy aýyl sharýashylyǵy ónimderi saýdasy jyl saıyn artyp keledi.
− Oǵan qosa, biz aýyl sharýashylyǵy ónimderin óndirý jáne qaıta óńdeý boıynsha birlesken kásiporyndar qurýǵa, agrarlyq sektordyń tıimdiligin arttyrý úshin ınnovatsııalyq, sý únemdeıtin tehnologııalardy engizýge múddeli qytaılyq ınvestorlarǵa qolaıly múmkindikterdi kórip otyrmyz, — dedi Serik Jumanǵarın.
2024 jyly Ortalyq Azııa óńiri men Qytaı arasyndaǵy saýda qarqyny 95 mlrd AQSh dollaryna jetken jáne onyń jartysyna jýyǵy Qazaqstanǵa tıesili boldy. Osylaısha, ekijaqty saýda aınalymy rekordtyq 44 mlrd dollarǵa jetken.
Aıta keteıik, búgin elordada «Ortalyq Azııa — Qytaı» ІІ sammıti ótedi. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysady.
Eń alǵashqy sammıt 2023 jyldyń 19 mamyrda Qytaıdyń Sıan qalasynda ótken edi. Sammıt qorytyndysynda Memleketter basshylary Sıan deklaratsııasyna qol qoıyp, birqatar bastamany qabyldaǵan.