Ortalyq Azııanyń eńbek mıgranttary Qazaqstanda 136 mlrd teńge «taýyp», óz elderine 1 trln teńge aýdarǵan
ASTANA. KAZINFORM — Parlament Senaty Qarjy jáne bıýdjet komıtetiniń tóraǵasy Sultanbek Mákejanov elge syrttan keletin eńbek mıgranttarynyń sanyndaǵy qaıshylyqtardy atady.
— Kóleńkeli ekonomıka máselesin qarastyrsaq, Joǵarǵy aýdıtorlyq palatanyń aýdıti nátıjesinde, kóleńkeli ekonomıkanyń kiris bóligi boıynsha bıýdjetke ákeletin janama shyǵyn 74 mlrd teńge bolǵan.
Mysaly, elimizge jaqyn ornalasqan Ortalyq Azııadaǵy úsh eldiń azamattary Qazaqstanda úsh jylda 136 mlrd teńge tapqan. Alaıda Ulttyq banktiń málimeti boıynsha, osy merzim aralyǵynda olar óz elderine shamamen 1 trln teńgege jýyq qarajat aýdarǵany anyqtaldy. Bul kórsetkishter — kóleńkeli ónim nemese kóleńkeli qyzmettiń naqty óndirilgenin kórsetetin birden-bir belgiler, — dedi senator.
Onyń paıymdaýynsha, osyndaı táýekelderdi azaıtý úshin kóleńkeli ekonomıkany baǵalaý tásilderin jáne salyq jeńildikteriniń tıimdiligin baqylaý ádisterin muqııat qarastyrý kerek.
Eńbek jáne halyqty áleýmettik qorǵaý mınıstrliginiń resmı deregine sensek, Qazaqstanǵa eńbek mıgranttaryn «eksporttaıtyn» negizgi elder mynalar; Qytaı — 5 054 adam, Ózbekstan — 1 926 adam, Túrkııa — 1 079 adam, Úndistan — 1 078 adam.