Ortalyq Azııanyń ár memleketiniń damýy búkil aımaqty kúsheıtedi – Memleket basshysy

ASTANA. KAZINFORM – Ortalyq Azııanyń ár memleketiniń damýy búkil aımaqty kúsheıtedi. Bul týraly «Ortalyq Azııa – Qytaı» ІІ sammıtinde Memleket basshysy Qasym-Jomart Toqaev aıtty.

- Biz Ortalyq Azııanyń bolashaǵyn birge damý modeli retinde kóremiz, ár memlekettiń jetistigi búkil aımaqty kúsheıtedi. Búginde elderimizdiń aldynda ortaq mindet tur – ulǵaıyp kele jatqan jahandyq aıqynsyzdyq jaǵdaıynda turaqty progresti qamtamasyz etý, - dedi Memleket basshysy.

Qasym-Jomart Toqaev sonyń aıasynda saýda-ekonomıkalyq baılanystardy nyǵaıtý aıryqsha mánge ıe bolatyndyǵyn aıtty.

– Qazaqstanda ekonomıkalyq ósimge serpin beretin tyń múmkindikter qarastyrylyp jatyr. Ásirese, Qytaımen birlesken jobalardy iske qosýǵa, taýar nomenklatýrasyn kóbeıtip, kórshiles el naryǵynda suranysqa ıe ónimder eksportyn ulǵaıtýǵa erekshe mán beriledi. Óńdelý deńgeıi tórtinshi satyǵa saı, qosylǵan quny joǵary ónim shyǵaratyn tehnologııalyq kásiporyndar ashýǵa nıettimiz. Aýyl sharýashylyǵy, sonyń ishinde ozyq agrotehnologııalar men tıimdi sý únemdeý ázirlemelerin qoldanysqa engizý baǵytyndaǵy yntymaqtastyq óte mańyzdy. Bul rette Qytaı kompanııalary agroónerkásip keshenindegi óndiris oryndaryn lokalızatsııalaý isine atsalysady dep úmittenemiz. Qazaqstan qytaı naryǵyna astyq pen un, et jáne sút ónimderi eksportyn ulǵaıtý áleýetine ıe. Sonymen qatar aýyl sharýashylyǵy ónimderin qaıta óńdeý salasynda da tabysty yntymaqtastyq úshin resýrstar bar», - dedi Prezıdent.

«Ortalyq Azııa – Qytaı» ІІ sammıtine Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.