Ortalyq Azııany syn-qater aımaǵy dep qaraý durys emes — FAO bas dırektory

ASTANA. KAZINFORM — Azyq-túlik jáne aýylsharýashylyq uıymynyń bas dırektory (FAO) Tsıýı Dýnıýı Astana halyqaralyq forýmynda Ortalyq Azııa elderine sý tapshylyǵy máselesin yntymaqpen sheshýge shaqyrdy.

— Sý tapshylyǵynyń ekologııalyq, áleýmettik saldary bolatyny qazirdiń ózinde sezinip otyrmyz. Sý qaýipsizdigi bolmasa, klımat kúızelisterine qarsy ornyqtylyq ta bolmaıdy. Eýropada, Ortalyq Azııa aımaǵynda azyq-túlik, sý qaýipsizdigi asa mańyzdy problema bolyp otyr. Ortalyq Azııa elderi, sonyń ishinde Qazaqstan, Tájikstan, Túrikmenstan, Ózbekstan klımat ózgerisiniń úlken yqpalynda. Bul úrdis kóptegen salanyń turaqtylyǵyna áser etip jatqanyn kórip otyrmyz, — dedi ol.

Sondaı-aq, ol bul problemany sheshýde ózara yntymaq pen jasandy ıntellekt taptyrmaıtyn qural bola alatynyn aıtty.

— Ortalyq Azııany bul turǵydan syn-qaterler aımaǵy dep aıtýǵa bolmaıdy. Ony kerisinshe múmkindikter aımaǵy dep ataýǵa bolady. Sizderge bul problemalarǵa tutas aǵza retinde qaraý kerek. Ol múmkindikterdi iske asyrý úshin yntymaq kerek. Óıtkeni bárimiz bir ózen basseıniniń boıynda turyp jatyrmyz. Shekara ózendi toqtatpaıtynyn túsinesizder ǵoı. Sondyqtan ózara senimge qurylǵan, ashyq qarym-qatynas qurý qajet. Bul maqsattarǵa jasandy ıntellekt quraldaryn da qoldanýǵa bolady, — dedi Tsıýı Dýnıýı.

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr.