Ortalyq Azııaǵa 6,2 mln tonna qazaqstandyq astyq jetkizildi
ASTANA. KAZINFORM — Elde 10 aıda 12,1 mln tonna astyq tasymaldandy.
2026 jyldyń 10 aıynda temirjol kóligimen 12,1 mln tonna astyq tasymaldandy. Bul ótken jyldyń sáıkes kezeńindegi kórsetkishten 9%-ǵa joǵary. Byltyr tasymaldaý kólemi 11,2 mln tonna.
Esepti kezeńde eksporttyq tasymal kólemi 9,4 mln tonnaǵa jetip, 2025 jyldyń sáıkes kezeńimen salystyrǵanda 11%-ǵa artty (8,5 mln tonna).
Eksporttyń negizgi kólemi Ortalyq Azııa elderine tıesili – 6,2 mln tonna. Bul ótken jylǵy kórsetkishten 27%-ǵa joǵary. Onyń ishinde Ózbekstanǵa 4,6 mln tonna (+35%), Tájikstanǵa – 1,3 mln tonna (+18%) astyq jóneltildi.
Aýǵanstanǵa 855 myń tonna astyq tasymaldandy, bul ótken jylǵy kórsetkishten 3,4 ese kóp. Qytaıǵa tasymal kólemi 65%-ǵaartyp, 935 myń tonna.
Qazirgi ýaqytta jańa egin astyǵyn tasymaldaý jumystary jalǵasýda. Qazan aıynda temirjol kóligimen 1,4 mln tonna astyq tasymaldandy.
Úzdiksiz tasymaldaýdy qamtamasyz etý úshin jyljymaly quramnyń jetkilikti parki bar. Qazirgi ýaqytta 16,9 myń astyq tasyǵysh, 17,8 myń jabyq vagon jáne 2 myńnan astam lokomotıv bar. Qolda bar resýrstar astyqty tolyq kólemde tasymaldaýǵa jetkilikti. Qajet bolǵan jaǵdaıda tasymaldaý kólemin ulǵaıtý úshin qosymsha múmkindikter qarastyrylǵan.
Jańa egin astyǵyn turaqty ári ýaqtyly jetkizýdi qamtamasyz etý maqsatynda Qazaqstan Respýblıkasy Kólik mınıstrligi temirjol tasymaldaryn uıymdastyrý jáne úılestirý jónindegi Astyq shtabyn qurdy. Shtab tasymaldaý protsesine qatysýshylardyń ózara is-qımylyn qamtamasyz etip, temirjol ınfraqurylymy men jyljymaly quramnyń daıyndyǵyna monıtorıng júrgizedi, sondaı-aq týyndaǵan máselelerdi jedel sheshý boıynsha jumysty úılestiredi.
Aıta ketelik qazaqstandyq astyqqa shetel suranysy artyp keletini týraly jazǵan edik.
