Ortalyq Azııadaǵy jańǵyrýdyń ortalyǵy – Qazaqstan: tájikstandyq sarapshy
ASTANA.KAZINFORM - Qazaqstan ınstıtýtsıonaldyq damý salasynda túrli reformalardy júzege asyryp, jańa tetikterdi tájirıbeden ótkizip keledi. Bul Ortalyq Azııa elderine damý men jańǵyrýdyń tıimdi baǵyttaryn tańdaýǵa úlgi bola alady.
Tájikstandyq saıasattanýshy Sheralı Rızoen osyndaı pikir bildirdi. Ol Quryltaı saılaýyna qatysty óz oıyn Kazinform agenttiginiń Dýshanbedegi menshikti tilshisine bergen suhbatynda aıtty.
Onyń aıtýynsha, Qazaqstan Ortalyq Azııadaǵy jańǵyrý úderisterine dástúrli túrde bastamashy bolyp keledi. Sonymen qatar el óńirdegi damýdyń jańa baǵyttaryn aıqyndaýǵa yqpal etip otyr.
— Ásirese 2025–2026 jyldardaǵy úderister Qazaqstannyń Ortalyq Azııadaǵy jańǵyrýdyń negizgi ortalyǵy ári bastaýy ekenin kórsetedi. Konstıtýtsııalyq reforma men zańnamalyq júıeniń jańarýy Qazaqstan úshin ǵana emes, búkil Ortalyq Azııa úshin de mańyzdy. Konstıtýtsııaǵa engizilgen negizgi ózgerister óńir elderiniń Ata zańdarynda qalyptasqan ortaq qaǵıdattarǵa jańa sıpat beredi. Bul ózgeristerde tarıhı qundylyqtar men azamattyq biregeılikke basymdyq berilgen, — dedi Ortalyq Azııadaǵy halyqaralyq qatynastar jáne qaýipsizdik máseleleri jónindegi sarapshy Sheralı Rızoen.
Spıkerdiń aıtýynsha, bir palataly parlament – Quryltaıdy saılaý eldegi saıası jańarýdyń kelesi kezeńi bolmaq. Bul Qazaqstannyń saıası damýynda jańa beleske jol ashady.
— Qazaqstanda júzege asyrylyp jatqan ózgerister Ortalyq Azııa elderi úshin damý men jańǵyrýdyń jańa baǵyttaryn aıqyndaýǵa úlgi bola alady. Bul qazirgi syn-qaterler men qaýipter únemi ózgerip otyrǵan kezeńde asa mańyzdy, — dep qosty saıasattanýshy.
Ol jańa parlamenttiń qurylýy men eldegi saıası ózgeristerdiń syrtqy jaǵdaıǵa da oń áser etetinin atap ótti.
Sarapshynyń sózinshe, bul qadamdar yqtımal syn-qaterlerdiń aldyn alýǵa baǵyttalǵan. Mundaı ózgerister Qazaqstan men Ortalyq Azııa elderine orta merzimdi perspektıvada tónetin qaýipterdi azaıtýǵa múmkindik beredi.
— Konstıtýtsııalyq jáne ınstıtýtsıonaldyq reformalardyń basty maqsaty – ishki saıasattaǵy turaqtylyqty qamtamasyz etip, túrli toptar arasyndaǵy tepe-teńdikti saqtaý. Sonymen qatar syrtqy kúshterdiń eldiń ishki saıasatyna yqpalyn barynsha shekteý kózdelgen. Bul – konstıtýtsııalyq referendým ótkizý týraly bastamadan bastalǵan reformalardyń jalǵasy. Atalǵan ózgerister Ortalyq Azııa elderiniń turaqty damý úshin jańa ınstıtýttardy óz betinshe quryp, jańǵyrta alatynyn kórsetedi, — dep túıindedi Sheralı Rızoen.
Aıta keteıik, úndistandyq saıasattanýshy Pravesh Kýmar Gýpta da Quryltaı saılaýyna qatysty pikir bildirdi.
