Ortalyq Azııadaǵy sý resýrsy men energetıka máseleleri boıynsha mańyzdy kelisim jasaldy
ASTANA. KAZINFORM — Qazaqstan, Qyrǵyzstan jáne Ózbekstan sý-energetıkalyq yntymaqtastyq jónindegi hattamaǵa qol qoıdy, dep habarlaıdy Energetıka mınıstrliginiń baspasóz qyzmeti.
Bishkek qalasynda Qazaqstan Respýblıkasy, Qyrǵyz Respýblıkasy jáne Ózbekstan Respýblıkasy sý-energetıka vedomstvolary basshylarynyń úshjaqty kezdesýi ótti.
Kelissózderge qazaqstandyq delegatsııany QR Energetıka vıtse-mınıstri Sanjar Jarkeshov bastady. Kezdesý barysynda taraptar sý-energetıka salasyndaǵy ózara is-qımyldyń ózekti máselelerin talqylady. Atap aıtqanda, óńirlik energojúıeniń turaqty jumysyn qamtamasyz etý, sý resýrstaryn utymdy paıdalaný jáne aldaǵy vegetatsııalyq ári kúzgi-qysqy kezeńderde birlesken is-qımyldardy úılestirý máselelerine erekshe nazar aýdaryldy.
Kezdesýge qatysýshylar energetıkalyq qaýipsizdikti nyǵaıtýǵa jáne óńirdiń ornyqty damýyn qamtamasyz etýge baǵyttalǵan turaqty dıalog pen praktıkalyq yntymaqtastyqtyń mańyzdylyǵyn atap ótti. Sý-energetıka salasyndaǵy tıimdi ózara is-qımyl Ortalyq Azııa memleketteriniń múddeler teńgerimin saqtaýǵa jáne tatý kórshilik qatynastardy nyǵaıtýǵa yqpal etetini aıtyldy.
Kelissózder barysynda taraptar elektr energııasyn jetkizý, energojúıelerdiń turaqty jumysyn qamtamasyz etý jáne sý-energetıkalyq rejımderdi úılestirý máselelerin qosa alǵanda, ózara tıimdi yntymaqtastyqty odan ári damytýǵa beıildilikterin rastady.
— Kezdesý qorytyndysy boıynsha qol jetkizilgen ýaǵdalastyqtardy bekitetin jáne ózara is-qımyldyń aldaǵy baǵyttaryn aıqyndaıtyn hattamaǵa qol qoıyldy. Qujat óńirlik áriptestikti nyǵaıtýǵa, birlesken jumystyń tıimdiligin arttyrýǵa jáne Ortalyq Azııanyń sý-energetıkalyq kesheniniń ornyqty damýyn qamtamasyz etýge baǵyttalǵan, — delingen habarlamada.
Budan buryn amerıkalyq sarapshy Ortalyq Azııa elderi sý máselesin retteý úshin áýeli shekara daýyn sheship alý kerek ekenin aıtqan edi.
