Ortalyq Azııadaǵy sheteldik ınvestıtsııalardyń 70%-y Qazaqstanǵa tıesili – Álıhan Smaıylov
Premer-Mınıstr Álıhan Smaıylov ár jyl saıyn álemniń túkpir-túkpirinen iri ónerkásip kásiporyndarynyń basshylaryn, qarjy sektorynyń ókilderin, saıasatkerler men sarapshylardyń basyn qosatyn VI Jahandyq ınvestıtsııalar jónindegi qazaqstandyq dóńgelek ústelge (Kazakhstan Global Investment Roundtable) qatysty, dep habarlaıdy Kazinform.
Osy jyldar ishinde KGIR ózin Qazaqstan men halyqaralyq ınvestıtsııalyq qoǵamdastyq arasyndaǵy yntymaqtastyqty nyǵaıtý úshin tıimdi dıalog alańy retinde kórsete aldy.
Premer-Mınıstr óz sózinde atap ótkendeı, Ortalyq Azııadaǵy sheteldik ınvestıtsııalardyń 70%-y Qazaqstanǵa tıesili.
«Ótken jyly tikeleı sheteldik ınvestıtsııalardyń jalpy kólemi 18%-ǵa ósip, $28 mlrd-qa jetti. Bıylǵy 6 aıda ulttyq ekonomıkaǵa taǵy $14 mlrd-qa jýyq tikeleı sheteldik ınvestıtsııalar tartyldy. Elimizdiń táýelsiz kredıttik reıtıngisiniń turaqtylyǵyn Fitch, S&P jáne Moody's halyqaralyq agenttikteri rastap otyr», — dedi Álıhan Smaıylov.
Úkimet basshysy Prezıdent Qasym-Jomart Kemeluly Toqaev bıylǵy Qazaqstan halqyna Joldaýynda jańa ekonomıkalyq modelge kóshý qajettigin jarııalaǵanyn eske saldy.
Atap aıtqanda, Úkimet aldyna 2029 jylǵa qaraı ekonomıka kólemin $450 mlrd-qa deıin, ıaǵnı 2 esege arttyrý boıynsha aýqymdy mindet qoıyldy.
«Investıtsııalardy tartý ekonomıkamyzdyń ósýiniń negizgi faktory bolyp tabylady. Ulttyq ınvestıtsııalyq saıasat sheńberinde ESG standarttaryn eskere otyryp, Qazaqstan 2029 jylǵa deıin keminde $150 mlrd sheteldik ınvestıtsııa tartýǵa múddeli. Sol úshin biz ınvestorlarǵa qolaıly jaǵdaılar jasaýdy, onyń ishinde ınvestıtsııalardy qoldaý quraldaryn jetildirýdi odan ári jalǵastyramyz», — dedi Premer-Mınıstr.
Álıhan Smaıylov búginde 83 eldiń azamattary Qazaqstanǵa vızasyz kele alatynyn, al 109 memlekettiń rezıdentteri úshin elektrondyq vızalar resimdeý qoljetimdi ekenin eske saldy.
Buǵan qosa erekshe ınvestorlyq vızalar qarastyrylǵan. Sondaı-aq elde bıznes úshin óńirdegi teńdesi joq qyzmetterdi usynatyn biregeı bıznes alańy – «Astana» halyqaralyq qarjy ortalyǵy jumys isteıdi.
«Bul qadamdardyń barlyǵy eldiń ınvestıtsııalyq áleýetin ashýǵa jáne naqty nátıjelerge qol jetkizýge baǵyttalǵan. Qazaqstan álemdik standarttarǵa sáıkes ınvestıtsııalyq klımatty odan ári arttyrý úshin bar kúshin salady. Sondaı-aq, ınvestorlardyń suranystaryna sáıkes qosymsha kerekti qoldaý sharalaryn turaqty túrde engizetin bolamyz. Osy múmkindikterdi paıdalana otyryp, Qazaqstan ekonomıkasyna belsendi ınvestıtsııa salýǵa shaqyramyz», — dep túıindedi sózin Premer-Mınıstr.
