Ortalyq Azııadaǵy BAQ pen AQSh bıligi «C5+1» formatyndaǵy kezdesý jaıly ne jazdy
18 qyrkúıekte Prezıdent Qasym-Jomart Toqaev AQSh-qa jumys saparymen bardy. Onyń barysynda Memleket basshysy «Ortalyq Azııa – AQSh» sammıtine qatysty. Bul rette Qasym-Jomart Toqaevtyń kezdesýlerde sóılegen sózi, Ortalyq Azııa elderiniń kóshbasshylary men AQSh prezıdenti Djo Baıdenniń basqosýy sheteldik baspasózde keńinen talqylandy, dep habarlaıdy QazAqparat tilshisi.
ÓzA (Ózbekstan)
«ÓzA» agenttigi Ortalyq Azııa elderiniń kóshbasshylary men AQSh prezıdenti Djo Baıdenniń kezdesýi barysynda óńirdi damytý úshin saýda-ınvestıtsııalyq qyzmetti kúsheıtý, jobalyq yntymaqtastyqty jolǵa qoıý, kólik dálizderin damytý sııaqty strategııalyq mańyzdy baǵyttar aıqyndalǵanyn jazdy. Sonymen birge bilim berý baǵdarlamalaryn keńeıtý, Aýǵanstandaǵy ahýaldy beıbit retteý úshin qoldaý kórsetý máseleleri de nazardan tys qalmady.
Sammıtte 8 jyl buryn Samarqand qalasynda qurylǵan «S5+1» formaty Ortalyq Azııa memleketteri men AQSh arasyndaǵy ashyq ári syndarly dıalog alańyna aınalǵany atap ótildi.
Agenttik bul kezedsýge Prezıdent Qasym-Jomart Toqaevtyń qatysqanyn jaza kele, Memleket basshysynyń Transkaspıı halyqaralyq kólik baǵdaryn (Orta dáliz) damytý bastamasyn kótergenine nazar aýdarǵan.
Sondaı-aq, ÓzA Prezıdenttiń halyqaralyq qoǵamdastyqtyń aldynda turǵan problemalardy BUU Qaýipsizdik Keńesiniń reformasynsyz sheshý múmkin emes degen paıymyna erekshe toqtalǵan.
Kabar (Qyrǵyz Respýblıkasy)
Qyrǵyzstannyń resmı buqaralyq aqparat quraldary da joǵary deńgeıdegi kezdesýdi kúnniń basty taqyrybyna balady. Bul júzdesýde Prezıdent Sadyr Japarov taraptar arasynda talqylanýy tıis máseleler aýqymy keńeıip kele jatqanyn atap ótti. «Kabardyń» jazýynsha, Amerıka Qurama Shtattarymen, onyń ishinde «S5+1» formaty negizindegi yntymaqtastyq eldiń syrtqy saıasatyndaǵy mańyzdy baǵyttardyń biri sanalady.
Sondaı-aq, kezdesý barysynda Sadyr Japarov Ortalyq Azııadaǵy óńirlik qaýipsizdik máselesin Aýǵanstandaǵy jaǵdaıdan bólip qarastyrý múmkin emestigin basa aıtty. Osyǵan baılanysty qyrǵyz tarapy atalǵan elde beıbitshilik pen turaqtylyq ornatý jolyndaǵy qadamdarǵa qoldaý kórsetýge daıyn ekenin jetkizdi.
Hovar (Tájikstan)
Tájikstan Respýblıkasynyń Prezıdenti Emomalı Rahmon da AQSh pen Ortalyq Azııa memleketteri basshylarynyń kezdesýine qatysyp, sóz sóıledi.
Tájikstannyń ulttyq aqparat agenttigi «Hovarda» jarııalanǵan maqalada «S5+1» formaty kezdesýinde Ortalyq Azııa elderiniń basshylary mańyzdy máseleler men jemisti yntymaqtastyqty odan ári nyǵaıtýǵa baǵyttalǵan birqatar usynys engizgeni jazyldy.
«Prezıdent Emomalı Rahmon bul kezdesý «Ortalyq Azııa – AQSh» formatyndaǵy yntymaqtastyqty odan ári nyǵaıtýǵa yqpal etetinine senim bildirdi», - dep atap ótti agenttik.
Munymen qatar tájik tarapy elderdiń ekonomıka, logıstıka, sý jáne energetıka salalaryndaǵy yntymaqtastyqty damytý usynysyna qoldaý kórsetti.
Túrikmenstan hronıkasy
Túrikmenstannyń bul aqparattyq portalynda BUU Bas Assambleıasynyń 78-shi sessııasyna qatysty jańalyqtar jıi jarııalandy.
Túrikmenstan Prezıdenti Serdar Berdimuhamedov BUU Jarǵysynyń qaǵıdalary negizinde jahandyq qaýipsizdik strategııasyn ázirleýdi usyndy.
Sondaı-aq, atalǵan basylym AQSh pen Ortalyq Azııa elderi basshysynyń terrorızmge qarsy kúres sharalary men ınvestıtsııa tartý múmkindikterin talqylaǵanyn atap ótken.
The White House (Aq úı)
Aq úıdiń saıtynda «C5+1» formatyndaǵy memleket basshylarynyń kezdesýi týraly maqala jarııalandy.
Aq úıdiń baspasóz qyzmetinen málimdegendeı, taraptar qaýipsizdik, aımaqtyq saýda jáne ınvestıtsııalar, sondaı-aq azamattyq qoǵamdy qoldaý máselelerin talqylady.
AQSh Prezıdenti Djo Baıden terrorızmmen kúres úshin Ortalyq Azııa elderine baǵyttalǵan qarjylyq qoldaýdyń artqanyn, AQSh pen aımaq elderiniń jeke kompanııalary arasyndaǵy ózara is-qımyldy damytý úshin jańa platforma qurý kerektigin, sondaı-aq tabıǵı resýrstardy jetkizý maqsatynda jańa marshrýttardy qurý múmkindikteri týraly aıtty.
Sonymen qatar, Djo Baıden azamattyq qoǵamdy odan ári qoldap, áıelderdiń ekonomıkalyq múmkindikterin keńeıtý máselelirne erekshe nazar aýdardy. Tıisinshe, «C5+1» múshe-memleketterdi múmkindigi shekteýli adamdardyń quqyǵyn qorǵaý isne den qoıýǵa shaqyrdy.
Buǵan qosa AQSh-tyń «THE HILL» saıası basylymynda Prezıdent Qasym-Jomart Toqaevtyń maqalasy jarııalandy. «BUU Bas Assambleıasy adamzattyń jaqyn aradaǵy ǵana emes, tutas ǵasyrlyq bolashaǵyn aıqyndaýǵa basa mán berýi kerek» taqyrybymen jaryq kórgen maqalada atalǵan uıym sheshýi tıis búgingi kúnniń mańyzdy máseleleri kóterligen.
«Men jer júzindegi áriptesterime ún qatqym keledi. Biz jalpy adamzattyń bolashaǵy úshin jaýapty ekenimizdi eshqashan esten shyǵarmaýymyz kerek. Ol mindet – saıası mansabymyzdan da, jer betinde ólshep berilgen ómirimizden de artyq», - delingen Memleket basshysynyń beldi «THE HILL» basylymynda jarııalanǵan maqalasynda.
Munda Prezıdent ıadrolyq qarýdyń zardaby men odan tóngen qaýipti, klımattyń ózgerýi, ekonomıkalyq damý tóńiregindegi máselelerdi kóterip, olardy sheshý úshin birlese jumys isteý qajettigin atap ótken.
