Ortalyq Azııada sý resýrstaryn basqarýdy tsıfrlyq monıtorıng negizinde kúsheıtý usynyldy
ASTANA. KAZINFORM — Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýtynda (QSZI) Halyqaralyq sý resýrstaryn basqarý ınstıtýtymen (IWMI) birlesip ázirlengen «Qazaqstannyń sý qaýipsizdigi: zamanaýı syn-qaterler jáne bolashaq balamalar» atty baıandamanyń tanystyrylymy ótti. Bul týraly ınstıtýttyń baspasóz qyzmeti málim etti.
Taldamalyq baıandama 2026 jylǵy 22–24 sáýir kúnderi Astana qalasynda ótetin Óńirlik ekologııalyq sammıt qarsańynda usynyldy. Іs-sharaǵa Qazaqstan men Ortalyq Azııa elderiniń memlekettik organdarynyń, halyqaralyq uıymdarynyń jáne ǵylymı-zertteý ınstıtýttarynyń ókilderi qatysty.
Alǵysóz sóılegen QR Prezıdenti janyndaǵy QSZI dırektory Jandos Shaımardanov klımattyq syn-qaterler jaǵdaıynda sý resýrstaryn basqarýda keshendi tásildiń mańyzdylyǵyn atap ótti. Ol ǵylymı qaýymdastyq, memlekettik qurylymdar jáne halyqaralyq seriktester arasyndaǵy syndarly dıalog óńirdegi sý qaýipsizdigin qamtamasyz etýdiń negizgi sharty ekenine senim bildirdi.
QSZI Ekonomıkalyq saıasatty taldaý bóliminiń bas sarapshysy Asel Aben zertteýdiń negizgi nátıjelerin tanystyryp, óńirdiń sý qaýipsizdigin nyǵaıtýdaǵy Qazaqstannyń eleýli úlesin atap ótti.
— Memleket basshysynyń tapsyrmasymen 2023 jyly Sý resýrstary jáne ırrıgatsııa mınıstrligi quryldy, al 2025 jyly jańa Sý kodeksi qabyldandy. Sonymen qatar, bıyl Qazaqstan Halyqaralyq Araldy qutqarý qory aıasyndaǵy tóraǵalyǵyn aıaqtaýda. Osy kezeńdegi mańyzdy nátıjelerdiń biri — Soltústik Aral teńizindegi sý aıdyny kóleminiń ulǵaıýy boldy, — dedi sarapshy.
Sonymen birge, baıandama avtorynyń pikirinshe, Ortalyq Azııa elderi sý resýrstaryn basqarý strategııasyn stsenarıılik josparlaý, tsıfrlyq monıtorıng jáne sý saıasatyn óńir elderiniń áleýmettik-ekonomıkalyq damý basymdyqtarymen tyǵyz yqpaldastyrý negizinde qalyptastyrýy mańyzdy.
Barbara ıAnýsh Pavletta óz sózinde Ortalyq Azııadaǵy sý máseleleri boıynsha óńirlik ózara is-qımyldyń ınstıtýtsıonaldyq-quqyqtyq aspektilerine jan-jaqty toqtaldy.
Suraq-jaýap sessııasy aıasynda qatysýshylar Qazaqstan men óńir elderinde sý resýrstaryn basqarý tıimdiligin arttyrý jáne sý sektoryn syrtqy ári ishki syn-qaterlerge beıimdeý perspektıvalary jóninde pikir almasty.
Aıta keteıik, 2030 jylǵa deıin 42 sý qoımasy salynyp, sý jınaý kólemi 2,6 mlrd tekshe metrge artady.
