Ortalyq Azııada muzdyqtardyń erýi men sý tapshylyǵy kúrdeli máselege aınalyp otyr
ASTANA. KAZINFORM — Ortalyq Azııada muzdyqtardyń erýi, sý tapshylyǵy men qurǵaqshylyq máselesi kúsheıip keledi. Bul týraly Quryltaı depýtaty Aıjan Sqaqova Dúnıejúzilik ǵylym kúnine oraı ótken halyqaralyq konferentsııada aıtty.
Depýtattyń sózinshe, sońǵy jyldary klımattyń ózgerýi óńirdegi sý qoryna áser etip jatyr.
— Sońǵy jyldary sý teńgeriminde eleýli ózgerister baıqalyp otyr. Muzdyqtardyń erýi, ózen aǵysynyń ózgerýi, qurǵaqshylyq pen shóleıttený Ortalyq Azııa úshin barǵan saıyn kúrdeli máselege aınalýda. Ǵylym bul ózgeristerdi túsindirip qana qoımaı, aldaǵy qaýipterdi boljaýǵa jáne naqty sheshimder tabýǵa kómektesýi kerek, — dedi Aıjan Sqaqova.
Onyń aıtýynsha, Qazaqstanda kóktemde sý tasqyny bolǵan óńirlerdiń ózi jazda sý tapshylyǵyna tap bolýy múmkin. Sondyqtan tasqyn sýdy saqtap, keıin paıdalaný joldaryn zertteý qajet.
— Osy maqsatta depýtat jetekshilik etken ǵylymı joba Jambyl, Almaty, Jetisý, Abaı jáne Shyǵys Qazaqstan oblystarynda júrgizildi. Ǵalymdar kóktemgi tasqyn sýdy jer astyna jınap, jerasty sý qoryn tolyqtyrý múmkindigin zerttedi, — dedi ol.
Budan bólek Aıjan Sqaqova Qazaqstannyń sý máselesin sheshýge baǵyttalǵan halyqaralyq bastamalaryna da toqtaldy. Onyń sózinshe, elimiz BUU aıasynda halyqaralyq sý uıymyn qurýdy usynǵan. Qazir bul másele boıynsha jumys júrgizilip jatyr.
— Sonymen qatar Qazaqstan 2025–2029 jyldarǵa ıÝNESKO-nyń sý resýrstaryn zertteýmen aınalysatyn úkimetaralyq keńesine saılanǵan. Bul elimizdiń basqa memlekettermen birlesip sý qoryn zertteýine múmkindik beredi, — dedi spıker.
Sondaı-aq depýtat Almatyda ıÝNESKO mártebesi bar muzdyqtardy zertteý ortalyǵy jumys isteıtinin de atap ótti. Qazaqstandaǵy muzdyqtardyń biri álemdik baqylaý jelisine engizilgen.
Aıta keteıik, buǵan deıin atalmysh jıynda Aıjan Sqaqova klımattyń ózgerýine baılanysty týyndaıtyn máselelerdi sheshý úshin ǵylymı zertteýlerdiń nátıjelerin memlekettik sheshimder qabyldaýda keńinen paıdalaný qajettigin aıtqan edi.
