Ortalyq Azııada klımattyq jáne áleýmettik derekterge ortaq talap ázirleý usynyldy
ASTANA. KAZINFORM — Ortalyq Azııa elderine klımattyń ózgerýi, halyq sany men áleýmettik-ekonomıkalyq jaǵdaı týraly málimetterdi jınaý jáne salystyrýdyń ortaq talaptaryn ázirleý usynyldy. Bul másele Astanada ótken «Ortalyq Azııa elderin turaqty damytýǵa arnalǵan ǵylym, derekter jáne boljaý» halyqaralyq konferentsııasynda kóterildi.
Quryltaı depýtaty ıÝlııa Kýchınskaıanyń aıtýynsha, klımattyń ózgerýi men tsıfrlandyrý óńirdegi halyqtyń qonystanýyna, eńbek naryǵyna jáne áleýmettik ınfraqurylymǵa áser etip jatyr. Mundaı jaǵdaıda memleketterge aldaǵy ózgeristerdi dál boljaý úshin senimdi ári tolyq málimetter qajet.
— Búginde Ortalyq Azııa elderiniń ǵalymdary men sarapshylary klımattyq jáne áleýmettik-ekonomıkalyq derekterdi jınaý men paıdalanýdyń ortaq talaptaryn ázirleýi asa mańyzdy. Bul talaptar málimetterdi ózara salystyrýǵa, olardyń qoǵamdaǵy naqty jaǵdaıdy tolyq qamtýyna jáne qaýipsiz saqtalýyna múmkindik berýi tıis. Óıtkeni biryńǵaı ádistemelik negiz qalyptaspaıynsha, óńirde bolyp jatqan ózgeristerdiń tutas kórinisin jasaý qıyn, — dedi spıker.
Onyń sózinshe, qazirgi esepke alý júıeleri negizinen resmı tirkelgen turǵyndar men kásiporyndar týraly aqparatty qamtıdy. Al shalǵaıdaǵy fermerler, ishki mıgranttar men áleýmettik osal toptardyń jaǵdaıy derekterde tolyq kórinbeýi múmkin. Bul memlekettik boljamdardyń dáldigine áser etedi.
Sonymen qatar ol Ortalyq Azııa elderiniń ǵalymdaryna klımattyq jáne demografııalyq ózgeristerdi shekaralas aýmaqtar mysalynda birlesip zertteýdi usyndy.
— Áleýmettanýshylar, demograftar, statıstıka jáne jasandy ıntellekt mamandarynyń birlesken jumysy memlekettik organdarǵa áleýmettik ınfraqurylymdy der kezinde josparlaýǵa jáne halyqtyń klımattyq ózgeristerge beıimdelýine qajetti sharalardy ázirleýge kómektesedi, — dedi ıÝlııa Kýchınskaıa.
Depýtat memlekettik sheshimder qabyldaǵanda boljamnyń nátıjesimen ǵana shektelmeı, onyń qandaı málimetterge súıengenin jáne qandaı táýekelder eskerilgenin túsiný mańyzdy ekenin jetkizdi.
Aıta keteıik, buǵan deıin Qazaqstanda Ortalyq Azııa ǵalymdarynyń klımattyń ózgerýine qatysty zertteýlerin biriktiretin tsıfrlyq platforma ázirlengeni habarlandy.
