Ortalyq Azııada biryńǵaı joǵary bilim keńistigi qalyptasyp keledi – Qasym-Jomart Toqaev
ASTANA. KAZINFORM – Qasym-Jomart Toqaevtyń aıtýynsha, Qazaqstan bilim berý, ǵylym, mádenıet jáne adamı kapıtaldy damytý salalaryndaǵy besjaqty yntymaqtastyqty keńeıtýdi árdaıym quptaıdy. Qazirgi ýaqytta Ortalyq Azııada biryńǵaı joǵary bilim keńistigi qalyptasyp keledi. Bul týraly Aqordanyń baspasóz qyzmeti málim etti.
– Búginde Qazaqstanda aımaqtaǵy elderden kelgen 9 myńǵa jýyq stýdent bilim alady. Biz Ortalyq Azııa jastarynyń elimizde joǵary bilim alýǵa umtylysyn baǵalaımyz. Osy kúni elimiz AQSh, Eýropa, Qytaı, Reseı jáne Ońtústik Koreıanyń ondaǵan tanymal ýnıversıtetterimen strategııalyq seriktestik ornatty. Qazaqstannyń kóptegen aımaǵynda sheteldik oqý oryndarynyń fılıaldary júıeli túrde ashylyp, stýdentterdi belsendi qabyldaı bastady. Buǵan qosa Qazaqstanda zertteý ýnıversıtetteriniń sany artyp, tehnoparkter men ınjenerlik ortalyqtar iske qosylyp jatyr. Biz Ortalyq Azııa jáne Kavkaz elderiniń jastaryn osy múmkindikti paıdalanyp, halyqaralyq deńgeıde suranysqa ıe qos dıplomdy bilim alýǵa shaqyramyz, – dedi Memleket basshysy.
Qasym-Jomart Toqaev aqparattyq-saraptamalyq saladaǵy yqpaldastyqty jandandyrý qajet ekenine nazar aýdardy. Memleket basshysy birlesken medıaónimderdi shyǵarý jumystaryn qolǵa alý jóninde úkimetterge tapsyrma berýdi usyndy.
– Ortaq tarıhı sıýjetterdi ekranızatsııalaýǵa, halyqtarymyzdyń dostyǵy men yntymaǵyn dáripteýge erekshe mán berý kerek. Biz jalpyóńirlik telearna jáne aqparattyq ınternet-portalyn ashý máselesin talqyladyq. Bul rette Ortalyq Azııa elderiniń telehabar taratý salasyndaǵy yntymaqtastyǵy týraly kelisimdi ázirlep, qol qoıýdyń mańyzy zor, – dedi Qasym-Jomart Toqaev.
Sondaı-aq Prezıdent Qazaqstannyń óńirlik seriktestikti jan-jaqty nyǵaıtýdy jáne Ortalyq Azııanyń álemdik arenadaǵy rólin arttyrýdy kózdeıtin strategııalyq baǵdary ózgermeıtinin atap ótti.
– Biz ulttyq deńgeıde «Tabysty Ortalyq Azııa – Tabysty Qazaqstan» formýlasyn berik ustanamyz. Óńirimizdiń bolashaǵy tek elderimiz arasyndaǵy senimdi dıalog pen yntymaqtastyqqa, barlyq ishki jáne syrtqy syn-qaterlerge laıyqty jaýapty birlesip izdeýge baılanysty ekenine senimdimin, – dedi Qazaqstan Prezıdenti.
Jıyn sońynda Memleket basshysy Ózbekstan Prezıdenti Shavkat Mırzıeevke Konsýltatıvtik kezdesýdiń kelesi tóraǵalyq mindetin tabysty atqarýyna tilektestik bildirdi.
Konsýltatıvtik kezdesýde Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov jáne Ózbekstan Prezıdenti Shavkat Mırzıeev sóz sóıledi.
