«Ortalyq Azııa — Japonııa» alǵashqy sammıti ótedi

ASTANA. KAZINFORM — Japonııa tarapy «Ortalyq Azııa — Japonııa» birinshi sammıtin ótkizýdi usyndy. Bul týraly Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý málim etti.

Búgin Astanaǵa alǵash resmı saparmen Japonııa Syrtqy ister mınıstri Takeshı Ivaıa keldi. Kezdesý barysynda ekijaqty qarym-qatynasty jańa deńgeıge kóterý jolyndaǵy máseleler talqylandy.

— Sonymen qatar Tokıo tarapy jańa bastama kóterip, «Ortalyq Azııa — Japonııa» birinshi sammıtin ótkizýdi usyndy. Ol bizdiń tarapymyzdan tolyq qoldaý taýyp otyr, —  dedi Murat Nurtileý BAQ aldynda málimdeme jasap.

Degenmen Syrty ister mınıstri atalǵan sammıttiń qashan jáne qaı elde ótetinin naqtylamady. 

Sondaı-aq Murat Nurtileý qazaq-japon qarym-qatynasynyń búgini kemel, bolashaǵy jarqyn ekenin basa aıtty. 

— Eki el de yntymaqtastyq rýhynda uzaq merzimdi seriktestiktiń órisin keńeıtý úshin belsendi kúsh-jiger jumsap jatyr. Qazaqta «saýsaq birikpeı, ıne ilikpeıdi» degen sóz bar. Qazaqstan men Japonııa arasyndaǵy qarym-qatynasty jańa deńgeıge kóterý syrtqy saıasatymyz ben uzaq merzimdi damýymyzdaǵy óte mańyzdy basymdyq, — dep qorytyndylady vedomstvo basshysy.

Aıta keteıik, Japonııa Semeı polıgonynan zardap shekkenderge qaıtarymsyz grant bólmek. 

Málimdeme barysynda belgili bolǵandaı, 2026 jyly «Almaty-Tokıo» tikeleı áýe reısi ashylady.