Ortalyq Azııa jáne Italııa kompanııalary «Astana» qarjy ortalyǵynyń múmkindigin paıdalana alady — Prezıdent

ASTANA. KAZINFORM — Búgin Qazaqstan Prezıdenti Qasym-Jomart Toqaev ıtalııalyq seriktesterdi Ortalyq Azııadaǵy birlesken jobalardy júzege asyrýǵa shaqyrdy.

— Qazirgi kezde Ortalyq Azııa elderi shekaralyq saýda-ekonomıkalyq habtar men ónerkásiptik kooperatsııa ortalyqtarynyń tutas jelisin ashý boıynsha jumys atqaryp jatyr. Biz ıtalııalyq seriktesterdi osy baǵytta birlesken jobalardy júzege asyrý múmkindigin qarastyrýǵa shaqyramyz. Bul turǵyda ıtalııalyq óndirýshiler búkil álem úshin sapa men ınnovatsııanyń eń joǵary standarttaryn belgilep kele jatqan toqyma, jıhaz, farmatsevtıka jáne avtomobıl ónerkásibindegi kásiporyndardy ashý týraly aıtyp otyrmyz, — dedi Qasym-Jomart Toqaev elordada «Ortalyq Azııa — Italııa» sammıtinde.

Osy oraıda Prezıdent Ortalyq Azııa óńiriniń jáne Italııanyń kompanııalary «Astana» halyqaralyq qarjy ortalyǵy usynatyn múmkindikterdi paıdalana alanyn atap ótti.

Budan buryn habarlanǵandaı, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr.

Aıtýly is-sharaǵa qurmetti meımandardan Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp otyr.