«Ortalyq Azııa» jańa ónerkásip ortalyǵy qazaqstandyqtarǵa ne beredi

ASTANA. KAZINFORM — Búgin Qazaqstan men Ózbekstan Prezıdentteri «Ortalyq Azııa» Halyqaralyq ónerkásiptik kooperatsııasy ortalyǵynyń qyzmetine resmı bastaý berdi. Bul ortalyqtyń elimizge áseri jóninde ekonomıst Rasýl Rysmambetov Jibek Joly telearnasyna bergen suhbatynda aıtyp berdi. 

Sarapshynyń aıtýynsha, ortalyqtyń negizgi maqsaty — birigip ınvestıtsııalar tartý.

— Kóptegen shet memleket Qazaqstandy, Ózbekstandy jáne Qyrǵyzstandy bir óńir, bir «standart jıyntyǵy» retinde qaraıdy. Investıtsııany birlesip tartý úshin de osylaı birlese áreket etý kerek. Biz kóptegen zatty Ózbekstannan satyp alyp, óńdep, qaıtadan Ózbekstanǵa jetkizemiz nemese kerisinshe ózimizdiń zatymyz Ózbekstanda óńdelip, keıin Qazaqstanǵa qaıtady. Sondyqtan osy Halyqaralyq ortalyq transshekaralyq jobalarǵa ınvestıtsııa tartýǵa baǵyttalady dep oılaımyn, — dedi Rasýl Rysmambetov.

Ekonomıst ortalyqtyń tıimdiligin qarapaıym qazaqstandyqtar qalaı sezine alatynyn da túsindirdi.

— Birinshiden, týrızm turǵysynan alǵanda Tashkentke barý ońaıyraq bolady. Jalpy alǵanda, bul ekonomıkalyq ósimge ákeledi. Ózbekstan taýarlaryn, ıaǵnı kókónis, jemis-jıdekterdi satyp alý jeńildeıdi dep oılaımyn. Sol sııaqty ózbekterge de qazaqstandyq taýarlardy alý jeńildeıdi, — deıdi ol.

Sonymen birge, sarapshy qazirdiń ózinde kóptegen qazaqstandyq pen ózbekstandyq yntymaqtastyqtyń artyqshylyqtaryn kóre bastaǵanyn aıtty.

— Dostarymnyń arasynda Ózbekstannan Almatyǵa, Astanaǵa, Oralǵa kelip, «Qanshama múmkindikti jiberip alyppyn, osynda kelip bıznes jasaýym kerek edi» dep aıtatyndar jıi kezdesedi, — deıdi Rasýl Rysmambetov.

Eske salaıyq, 14-15 qarasha kúnderi Qasym-Jomart Toqaev Ózbekstan Prezıdenti Shavkat Mırzıeevtiń shaqyrýymen Tashkentke memlekettik sapar jasady. Memleketter basshylary shaǵyn jáne keńeıtilgen quramda kelissóz júrgizip, Qazaqstan-Ózbekstan Joǵary memleketaralyq keńesiniń ekinshi otyrysyn ótkizdi.

Buǵan deıin Qazaqstan men Ózbekstan prezıdentteri BAQ ókilderine arnalǵan brıfıng ótkizdi.

Al 16 qarashada Prezıdent Tashkentte ótetin Ortalyq Azııa jáne Ázerbaıjan memleketteri basshylarynyń VII Konsýltatıvtik kezdesýine qatysady.