Ortalyq Azııa sý-energetıkalyq konsortsıýmy nege qurylmaı jatyr – vıtse-mınıstr

ASTANA. KAZINFORM – QR Sý resýrstary jáne ırrıgatsııa birinshi vıtse-mınıstri Nurlan Aldamjarov Ortalyq kommýnıkatsııalar qyzmetinde ótken baspasóz konferentsııasynda Ortalyq Azııa elderi arasyndaǵy transshekaralyq ózenderdi birlesip paıdalaný máselesine qatysty pikir bildirdi.

Qazaqstan, Ózbekstan, Qyrǵyzstan jáne Tájikstan Respýblıkalary transshekaralyq ózenderdi paıdalaný boıynsha ortaq naqty kelisimge áli kele almaı otyrǵany belgili. Atap aıtqanda, 1995 jyldan beri sý-energetıkalyq konsortsıým qurý týraly usynys aıtylyp keledi, alaıda bul bastama áli kúnge deıin tolyq iske asqan joq. Osyǵan baılanysty jýrnalıster ortaq mámilege kelýge ne kedergi bolyp otyrǵanyn surady.

– Sý-energetıkalyq konsortsıým máselesi boıynsha mınıstrlik tıisti jumystardy atqaryp jatyr. Ótken aptada Túrkistan qalasynda Ózbekstan Respýblıkasymen kelissózder ótkizdik. Kezdesýde negizgi suraqtardyń biri – energetıkalyq yntymaqtastyqty konsortsıým formatynda qalaı júzege asyrý kerektigi boldy. Nátıjesinde taraptar eki aı kóleminde ózara usynystardy birlesip qaraýǵa kelisti. Qazirgi tańda mundaı konsortsıým qurylǵan joq, alaıda osy baǵytta jumys jalǵasyp jatyr, – dedi Nurlan Aldamjarov.

Sondaı-aq baspasóz konferentsııasy barysynda tilshiler sý bólý máselesinde qaı kórshi eldermen kelissózder kúrdelirek júrip jatqanyn surady.

– Barlyq kórshiles memleketpen Qazaqstannyń yntymaqtastyǵy konstrýktıvti túrde damyp keledi dep aıtýǵa bolady. Arnaıy komıssııa otyrystary turaqty túrde ótip jatyr. Onda ózekti máseleler talqylanyp, kezeń-kezeńimen sheshimin taýyp jatyr. Bul baǵyttaǵy jumystar aldaǵy ýaqytta da jalǵasa beredi, – dep túıindedi birinshi vıtse-mınıstr.

Soltústik Aral teńizin saqtaý jobasynyń ekinshi kezeńi ázirlenip jatyr. Onda Kókaral bógetin qaıta qurý jáne teńiz deńgeıin Baltyq júıesi boıynsha 44 metrge deıin kóterý kózdelgen.