«Ortalyq Azııa – ShYU-nyń ózegi»: uıymǵa múshe elder Dýshanbede bos qosty
ASTANA. KAZINFORM – Shanhaı yntymaqtastyq uıymynyń Bas hatshysy Nurlan Ermekbaev búgin Dýshanbe qalasynda ótken «Ortalyq Azııa – ShYU-nyń ózegi: birlesken damý múddesindegi 25 jyldyq yntymaqtastyq» atty halyqaralyq konferentsııa delegattaryna beıneúndeý joldady.
Óz sózinde Bas hatshy ShYU-nyń shırek ǵasyr ishinde bedeldi halyqaralyq uıymǵa aınalǵanyn, myzǵymas normatıvtik-quqyqtyq bazasyn jáne ózara is-qımyl tetigin qalyptastyrǵanyn, sondaı-aq ortaq qaǵıdat pen qundylyq ustanatyn memleketter men halyqaralyq birlestiktermen seriktestik qatynas ornaǵanyn aıtty.
Nurlan Ermekbaev ShYU qyzmetin Ortalyq Azııa óńiriniń qaýipsizdigin qamtamasyz etý jáne damytý máselelerinen bastaǵanyn eske saldy. 2021 jylǵy qyrkúıekte Dýshanbede qabyldanǵan uıymnyń 20 jyldyǵyna arnalǵan deklaratsııada múshe memleketterdiń kóshbasshylary Ortalyq Azııany «ShYU-nyń ózegi» dep ataǵan bolatyn, al byltyr Astanada ótken sammıt barysynda uıym men Ortalyq Azııa elderiniń strategııalyq damý maqsatynyń bir-birin ózara tolyqtyratyny erekshe atap ótildi.
Bıyl kúzde Qytaıdyń Tıantszın qalasynda ótetin ShYU-ǵa múshe memleketter basshylary keńesiniń aldaǵy otyrysyna daıyndyq pen onyń mazmundyq bóligin pysyqtaý jumystary júrip jatyr.
Bas hatshy Dýshanbedegi halyqaralyq konferentsııa ShYU-nyń «ózegi – Ortalyq Azııanyń» áleýetin tolyq ashýǵa baǵyttalǵan jańa ıdeıalar men usynystardy qalyptastyrýda mańyzdy ról atqarady degen úmit artty.
Eske salaıyq, bıyl kúzde ShYU-ǵa múshe memleketter basshylary keńesiniń 25-otyrysy Qytaıdyń Tıantszın qalasynda ótedi. Osyǵan oraı, ShYU Bas hatshysy Nurlan Ermekbaevqa sammıtte memleket basshylary qarastyratyn máseleler, jalpy uıymnyń qyzmeti, «úsh zulymdyqpen» kúres, uıym keńistiginde biryńǵaı tsıfrlyq valıýta engizý syndy jaıttarǵa qatysty saýal qoıyp, suhbatqa tartqan edik.
Aıta ketsek, ShYU elderi Izraıldiń Iranǵa jasaǵan áskerı shabýylyn qatań aıyptady.