Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy
ASTANA. KAZINFORM – Elordada ІІ Astana Think Tank Forum-2025 halyqaralyq forýmy ótip jatyr. Іs-shara aıasynda Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy.
- Qazaqstan búginde tek saıasat pen ekonomıka emes, ıdeıalar men bilimniń ortalyǵyna aınalyp keledi. Bıyl biz Astana Think Tank Forum-dy ekinshi jyl qatarynan ótkizip otyrmyz. Búgingi kúrdeli halyqaralyq jaǵdaı forýmnyń ózektiligin aıqyndap otyr desek bolady. Sondyqtan munda aıtylatyn árbir oı men usynys jahandyq ózara túsinistik pen senimge óz úlesin qosady dep senemin. Qazaqstan búgingi tańda orta derjavalar arasynda kóptegen ózekti másele boıynsha kózqarasy men bastamalaryn usyna alady. Sondyqtan da, osy forým arqyly biz senimge, ashyq pikirtalasqa jáne naqty sheshimderge negizdelgen alańdy usynyp otyrmyz, - dedi QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov.
Instıtýt basshysy Astana Think Tank forýmy ıdeıalardy yntymaqtastyqty, al saraptamalardy is-qımylǵa aınaldyrý maqsatynda qurylǵanyn basa aıtty.
- Bul rásimdik is-shara emes. Bul – sarapshylar, saıasatkerler men seriktester óz ıdeıalaryn tekserip, boljamdarǵa kúmán keltire alatyn, is júzindegi sheshimderdi birlesip ázirleıtin jumys forýmy. Bıyl biz Ortalyq Azııa saraptamalaryn álemdik zertteý qaýymdastyǵymen biriktiretin jańa tsıfrlyq InsightsCentral.Asia platformasyn qosý arqyly alǵa qaraı mańyzdy qadam jasaımyz, - dedi ol.
Aıta keteıik, QR Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan is-sharaǵa álemniń 20 elinen 40-qa jýyq sheteldik sarapshy, jetekshi «aqyl-oı ortalyqtarynyń» basshylary men zertteýshileri qatysyp jatyr. Forým aıasynda ótetin 9 taqyryptyq sessııada álemdik saıasat pen halyqaralyq qatynastardyń negizgi baǵyttary talqylanbaq.
Aıta keteıik, Digital Bridge-2025 halyqaralyq tehnologııalyq forýmynda qazaqstandyq jáne sheteldik áleýeti zor jobalar kórmesi ótti.