Ortalyq Azııa men Shyǵanaqtaǵy arab elderi tranzıttik áleýetti arttyrýǵa nıetti
TAShKENT. KAZINFORM – «Ortalyq Azııa - Shyǵanaqtaǵy arab memleketteriniń yntymaqtastyǵy keńesiniń» sammıti qarsańynda Tashkentte beldi taldaý ortalyqtarynyń alǵashqy forýmy ótti, dep habarlaıdy Kazinform agenttiginiń menshikti tilshisi.
Іs-sharaǵa Ortalyq Azııa jáne BAÁ, Bahreın, Kýveıt, Oman, Qatar, Saýd Arabııasynan kelgen sarapshylar qatysty. Olar bolashaqta yntymaqtastyqty nyǵaıtýǵa sep bolatyn salalar men jobalardyń jaı-kúıin baǵamdap kórdi.
Forýmǵa qatysýshylar atap ótkendeı, Shyǵanaq elderiniń jahandyq saıasat, ınvestıtsııa jáne ekonomıkadaǵy orny erekshe. Tıisinshe, osy áleýetti paıdalana otyryp, Ortalyq Azııa men Shyǵanaqtaǵy arab elderi ózara baılanystardy nyǵaıtýǵa múddeli.
- Qos óńir bir-birin endi tereń zerdelep bastady. Sondyqtan osyndaı formattaǵy jıyndar sarapshylar úshin aqparat almasýǵa jáne bolashaq yntymaqtastyq baǵyttaryn anyqtaýǵa kómektesedi. Pikir bildirip, dıalog ornattyq. Jalpy elder týraly túrli túsinikter bolady. Al ony syrttaı emes, kózben kórip, ishteı taný memleketterdiń ózara baılanysyna jol ashady degen senimdemin, - dedi QR Prezıdenti janyndaǵy QSZI dırektorynyń orynbasary Asqar Nursha.
Sammıt Ortalyq Azııa memleketteriniń ishki aımaqtyq yntymaqtastyǵyn arttyryp, óńirdiń jahandyq mańyzdylyǵyn kúsheıtýge yqpal etedi. Baılanystardy tereńdetý úshin jańa múmkindikterge jol ashady. Sarapshylar Samarqandtaǵy sammıt aımaqtyń tranzıttik áleýetine tyń serpin bererine senimdi.
- Keıingi jyldary «Ortalyq Azııa +» formatyndaǵy jıyndar jıi ótkizilip keledi. Bul aımaqtyń mańyzdylyǵyn aıǵaqtap tur. Bizben dıalog ornatyp, ekonomıkalyq baılanystyrdy nyǵaıtýǵa nıetti elderdiń geografııasy keńeıe tústi. Ortalyq Azııa búginde jańa múmkindikterge jol ashatyn úlken naryq boldy. Shyǵanaqtaǵy Arab elderiniń sarapshylarymen dıalogymyz sátti ótti. Bul basqosý dástúrge aınalýy múmkin, - dedi Ortalyq Azııa halyqaralyq zertteýler ınstıtýtynyń sarapshysy Ýmrbek ıÝsýpov Kazinform tilshisiniń saýalyna jaýap bere otyryp.
Eske salaıyq, «Ortalyq Azııa - Shyǵanaqtaǵy arab memleketteriniń yntymaqtastyǵy keńesiniń» ekinshi sammıti 5 mamyrda Samarqand qalasynda ótedi.