Ortalyq Azııa men Qytaı kásipkerleri tsıfrlyq yntymaqtastyq jóninde ýaǵdalasty
ASTANA. KAZINFORM — «Ortalyq Azııa — Qytaı» iskerlik keńesiniń otyrysyna 6 memlekettiń saýda-ónerkásip palatalary tsıfrlyq yntymaqtastyqqa kóshý jóninde ýaǵdalasty.
«Atameken» ulttyq kásipkerler palatasynyń tóralqa tóraǵasy Raıymbek Batalovtyń aıtýynsha, bul sharaǵa Ózbekstannan, Qyrǵyzstannan, Tájikstannan, Túrikmenstannan kásipkerler keldi. Qytaıdan da ulttyq kásipkerler palatasy sııaqty qurylym bastamasymen 300-den astam kompanııa ókilderi keldi. Іskerlik keńes otyrysyna deıin olarmen aýqymdy daıyndyq jumystary júrgizilgen.
— Bul jaı ǵana hattamalyq jumys emes, ıaǵnı jınalyp, memorandýmǵa qol qoıyp, tarap ketetin shara emes. Eń bastysy, qazaqstandyq jáne jalpy ortalyqazııalyq bıznes pen qytaılyq kompanııalar arasynda aldyn ala naqty jumys atqaryldy. Búgin tek memorandýmdar ǵana emes, naqty kelisimsharttar jasalyp, jobalar qolǵa alyna bastady. Bul forýmǵa óńir ákimderi de, aımaqtardyń ókilderi de qatysyp otyr. Qol qoıylǵan kelisimsharttardyń júzege asa bastaýy — biz úshin eń mańyzdy nátıje, — dedi R. Batalov.
Sonymen birge, ár eldiń saýda-ónerkásip palatalarymen tsıfrlyq yntymaqtastyqqa kóshý jóninde ýaǵdalastyq jasaldy. Qazaqstanda bul baǵytta ne jasalyp jatqany, Úkimet pen Ulttyq palatanyń tájirıbesi tanystyrylǵan.
— Meniń oıymsha, bul bızneske óte yńǵaıly, olar qaı salaǵa ınvestıtsııa salýǵa bolatynyn jáne naqty taldaýlardy kóre alady. Demek, alda bizge úlken ári jaýapty jumys júkteledi. Bul tásil bıznestiń naqty jobalardy júzege asyrýyna, ilgeriletýine múmkindik beredi. Taǵy bir mańyzdy másele — kólik pen logıstıka, jasyl dáliz, kedendik rásimder men sertıfıkattaý sekildi bıznestiń kúndelikti betpe-bet kelip otyrǵan túıtkilderi. Bul máseleler tek Qytaıdan keletin ımportqa emes, Qazaqstan men Ortalyq Azııa elderiniń Qytaı naryǵyna shyǵatyn eksporttyq áleýetin de tejep otyr. Bul — úlken jáne óte mańyzdy másele, — dedi Raıymbek Batalov.
Aıta keteıik, búgin elordada «Ortalyq Azııa — Qytaı» ІІ sammıti ótedi. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysady.
2025 jyldyń alǵashqy toqsanynda Qazaqstannyń Qytaımen jáne Ortalyq Azııa elderimen taýar aınalymy 29,3 mlrd dollarǵa jetti, Qytaıdan ımport kólemi 18%-ǵa ósti.