Ortalyq Azııa men arab elderiniń syrtqy ister mınıstrleri Tashkentte kezdesti
TAShKENT. KAZINFORM – Búgin Tashkentte Syrtqy ister mınıstrleriniń «Ortalyq Azııa – Parsy shyǵanaǵyndaǵy arab memleketteriniń yntymaqtastyq keńesi» strategııalyq dıalogynyń ekinshi kezdesýi ótti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Basqosýǵa Qatar, Bahreın, Kýveıt, Saýd Arabııasy, Oman, Ázerbaıjan jáne Ortalyq Azııa elderi syrtqy saıası vedomstvolarynyń basshylary men orynbasarlary qatysty.
Kezdesý barysynda mınıstrler saıasat, qaýipsizdik, saýda-ekonomıkalyq, ınvestıtsııalyq, kólik-logıstıkalyq jáne «jasyl» energetıkany damytý máselelerin talqylady. Sondaı-aq, delegattar halyqaralyq jáne óńirdegi ózekti máseleler boıynsha, atap aıtqanda Aýǵanstan, Taıaý Shyǵystaǵy jaǵdaı, Palestına-Izraıl qaqtyǵysy sııaqty birqatar taqyryp tóńireginde pikir almasty.
«Bizdiń elderimiz arasyndaǵy yntymaqtastyqtyń tereń tarıhy bar. Sondyqtan «Ortalyq Azııa – Parsy shyǵanaǵyndaǵy arab memleketteriniń yntymaqtastyq keńesi» dıalogyna qyzyǵýshylyq basym. Muny Qazaqstan tarapy yntymaqtastyqty nyǵaıtý, halyqaralyq jáne óńirlik kún tártibindegi ózekti máselelerdi talqylaý, sondaı-aq túrli saladaǵy baılanystardy arttyrýdyń tıimdi tásilderin izdestiretin halyqaralyq alań retinde qarastyrady. Jahandyq qaýip pen óńirlik táýekelderdiń údeı túskenine qaramastan Ortalyq Azııa aımaǵy óziniń turaqtylyǵyn kórsetip, odan ári ósý men damý úshin áleýetin utymdy paıdalanyp keledi», - dep toqtaldy kezdesýge qatysqan QR Syrtqy ister mınıstriniń orynbasary Álibek Baqaev.
Aıta keteıik, bul jolǵy mınıstrler júzdesýi 2025 jyly Samarqanda memleket basshylarynyń deńgeıinde ótetin «Ortalyq Azııa – Parsy shyǵanaǵyndaǵy arab memleketteriniń yntymaqtastyq keńesi» strategııalyq dıalogynyń ekinshi sammıtine daıyndyq sanalady.
