Ortalyq Azııa men AQSh yntymaqtastyqty nyǵaıta túsýge nıetti
TAShKENT. KAZINFORM — Ózbekstan astanasynda Ortalyq Azııa men AQSh sarapshylarynyń alǵashqy forýmy ótti, dep habarlaıdy Kazinform agenttiginiń menshikti tilshisi.
Aýqymdy is-shara Ortalyq Azııa halyqaralyq ınstıtýtynyń uıymdastyrýymen ótti. Oǵan óńir elderi men AQSh-tan kelgen beldi saıasattanýshylar, kompanııa jetekshileri, memlekettik organ ókilderi qatysty.
Forým barysynda sarapshylar «S5+1» formatynyń jumysyn jandandyrý, aımaqtyq qaýipsizdik, bıznes jáne sırek kezdesetin mınereldar salasyndaǵy yntymaqtastyq múmkindikterin talqylady.
— Biz óńirdiń geografııalyq ornalasýyn tıimdi paıdalanýymyz kerek. Soltústiktegi kórshimiz geosaıası jaǵdaılarǵa baılanysty tranzıttik aımaq mártebesinen aıyryldy. Demek bul mindet Ortalyq Azııaǵa júkteldi. Qytaı men Eýropanyń arasyn jalǵaıtyn dálizge aınalyp otyr. Tıisinshe, tranzıttik áleýetti ekonomıkalyq turǵydan tıimdi paıdalana bilý joldaryn izdestirý mańyzdy, — dedi Kazinform tilshisine suhbat bergen qyrǵyzstandyq saıasattanýshy Shaırbek Djýraev.
Sarapshylardyń paıymynsha, aımaq elderiniń Orta dálizdi damytýǵa mán bergeni oryndy. Qazirgi ýaqytta bul baǵyttyń áleýeti tolyq paıdalanylyp jatqan joq.
— Forým barsynda Ortalyq Azııa men AQSh arasyndaǵy yqpaldastyq strategııasy qaıta qaraldy. Atap aıtqanda, ekonomıkalyq jáne ınvestıtsııalyq baılanystardy nyǵaıtýǵa múmkindik beretin jobalarǵa erekshe nazar aýdardyq. Ol úshin birinshi kezekte kólik-logıstıka salasyn damytý qajet. Bul rette Transkaspıı dáliziniń ınfroqurylymyn jaqsartý, onyń júk ótkizý qaýqaryn arttyrýǵa mán bergen oryndy. Atalǵan baǵyt Eýropa men Shyǵysty baılanystyratyn strategııalyq mártebege ıe. Sondyqtan ony damytýǵa aımaq elderi men AQSh tarapy qoldaý bildirip otyr, — dedi Ortalyq Azııa halyqaralyq ınstıtýtynyń jetekshi ǵylymı qyzmetker Shavkat Alımbekov.
Ózara senim men tatý kórshilikke negizdelgen yntymaqtastyq, tutas aımaqtyń ıntegratsııasy óńirdiń halyqaralyq arenadaǵy ornyn aıshyqtaı túsedi. Sarapshylar atap ótkendeı, aımaqtaný úrdisine bet alý Ortalyq Azııany álemdik derjavalarmen teń dárejede dıalog júrgize alatyn mártebege shyǵaryp, yqtımal túıtkilderdiń aldyn alýǵa sep bolady.
— Kóptegen qater men táýekeldiń aldyn alýǵa baǵyttalǵan logıkalyq sheshim — ol aımaqtaný úrdisine bet alý, ıaǵnı Ortalyq Azııaǵa halyqaralyq qarym-qatynas júıesiniń birtutas bóligi retinde qaraý kerek. Bul baǵytta aýqymdy ister atqarylyp jatyr. Máselen, Memleket basshylarynyń Konsýltatıvtik kezdesýi — osynyń jarqyn kórinisi. Bıyl jetinshi otyrys ótedi. Meniń oıymsha, búginde óńir elderi arasyndaǵy seriktestik ınstıtýtsıonaldyq ıntegratsııaǵa oıysyp keledi. Birtutastyq — túrli geosaıası turaqsyzdyqtyń aldyn alyp, ilgerileýge múmkindik beretin qural, — dep málim etti beldi ózbekstandyq saıasattanýshy Farhod Tolıpov.
Forýmynyń qortyndysy boıynsha sarapshylar memlekettik organdar men el úkimetterine usynystar ázirleýge ýaǵdalasty. Sonymen qatar, mundaı basqosýlardy dástúrli túrde uıymdastyryp otyrýǵa kelisti.
Qosa ketsek, buǵan deıin ózbekstandyq sarapshylar Qazaqstannyń damýy búkil Ortalyq Azııanyń ilgerileýine yqpal etetinin aıtyp edi.