«Ortalyq Azııa – Qytaı» sammıti: Qazaqstan Prezıdenti Aýǵanstanǵa qatysty usynys aıtty

ASTANA. KAZINFORM — Aýǵanstandy saýda-ekonomıkalyq qatynastarǵa tartý osy eldi qalpyna keltirýdi jyldamdatady. Bul týraly elordadaǵy Táýelsizdik saraıynda «Ortalyq Azııa – Qytaı» ІІ sammıtinde Memleket basshysy Qasym-Jomart Toqaev málim etti.

- Bizdiń ózara is-qımylymyzdyń taǵy bir aspektisi – ol Aýǵanstan. Bizdiń oıymyzsha, bul eldi saýda-ekonomıkalyq qatynastarǵa tartý ony qalpyna keltirýge jáne halyqaralyq oqshaýlanýdan shyǵarýǵa yqpal etedi. Dál osy baǵytta biz Aýǵanstan úkimetimen jumys istep jatyrmyz. Qytaı men Ortalyq Azııa elderine Almaty qalasynda Ortalyq Azııa jáne Aýǵanstan úshin BUU-nyń Óńirlik ortalyǵyn qurýǵa qoldaý kórsetkeni úshin alǵysymdy bildiremin, - dedi Qasym-Jomart Toqaev.

Prezıdenttiń aıtýynsha, óńirdiń bolashaǵy osy aýmaqtaǵy elderdiń ózara múddelerdi eskere otyryp, birlesip áreket ete alýyna baılanysty. Osy oraıda «Ortalyq Azııa-Qytaı» formaty jasampaz strategııalyq seriktestiktiń aıqyn úlgisine aınalatynyna senim artty.

Budan buryn habarlanǵandaı, Astanada «Ortalyq Azııa – Qytaı» ІІ sammıti jumysyn bastady.