«Ortalyq Azııa – Qytaı» ІІ sammıti bastaldy

ASTANA. KAZINFORM – Elordadaǵy Táýelsizdik saraıynda «Ortalyq Azııa – Qytaı» ІІ sammıti jumysyn bastady.

Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın,  Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov  jáne Tájikstan Prezıdenti Emomalı Rahmon qatysyp otyr.

Aıta keterligi, «Ortalyq Azııa - Qytaı» І sammıti 2023 jyldyń 19 mamyrynda Qytaıdyń Sıan qalasynda ótti. Sol kezde Qasym-Jomart Toqaev Ortalyq Azııa men Qytaıdyń ekinshi sammıtin Qazaqstanda ótkizýge ázir ekenin jetkizdi. Sammıt qorytyndysynda Sıan deklaratsııasyna qol qoıylyp, ekinshi sammıtti 2025 jyly Qazaqstan ótkizý týraly sheshim qabyldandy.

ІІ sammıt qarsańynda, keshe elordada Qazaqstan men Qytaı arasyndaǵy yqpaldastyqqa tyń serpin beretin birqatar mańyzdy is-shara uıymdastyryldy. Atap aıtqanda, Ortalyq Azııa — Qytaı: Energetıka» forýmy ótti.

Onda Qytaı kompanııalarynyń qatysýymen elimizde jańartylatyn energııa boıynsha 30 joba júzege asyrylyp jatqany aıtyldy.

Al «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmynda Qazaqstan men Qytaı jalpy somasy 25 mıllıard AQSh dollaryna jýyq shamamen 60 túrli kelisimge qol qoıdy.

Munan bólek, Qytaı men Ortalyq Azııanyń «Tatý kórshilik jáne dostyq: bolashaqqa birge qadam» atty gýmanıtarlyq almasý forýmy uıymdastyryldy.

Búgin «Ortalyq Azııa — Qytaı» iskerlik keńesiniń ekinshi otyrysy ótip jatyr.