Ortalyq Azııa – Qytaı: BAQ ıntegratsııasynyń jańa kezeńi
ASTANA. KAZINFORM – Astanada «Qytaı – Ortalyq Azııa» aqparat agenttikteriniń forýmy ótti. Іs-sharany «Sınhýa» aqparat agenttigi QR Prezıdenti Teleradıokesheniniń qoldaýymen uıymdastyrǵan.
Forým qarsańynda QR Prezıdenti Teleradıokesheniniń dırektory Raýshan Qajybaeva men «Sınhýa» aqparattyq agenttiginiń Bas dırektory Fý Hýa ekijaqty kezdesý ótkizdi.
Taraptar jan-jaqty strategııalyq áriptestikti nyǵaıtý, Ortalyq Azııa men Qytaıdyń buqaralyq aqparat quraldarynyń halyqaralyq aqparat keńistigindegi únin kúsheıtý, adamzattyń ortaq taǵdyry qaýymdastyǵyn qurý protsesindegi ózara is-qımyl máselelerin talqylady.
Forýmnyń ashylýynda QR Prezıdenti Teleradıokesheniniń dırektory Raýshan Kajybaeva kún tártibine shyǵarylǵan máselelerdiń ózektiligi men mańyzdylyǵyn atap ótti.
Medıaholdıng basshysynyń aıtýynsha, Ortalyq Azııa men Qytaıdy tek geografııasy men ekonomıkasy emes, ǵasyrdan-ǵasyrǵa jalǵasyp kele jatqan mádenı qaýymdastyq, ortaq dástúrler men beıbitshilikke degen umtylysy biriktiredi. Júzdegen jyldar boıy Uly Jibek joly Eýrazııa keństigindegi orasan zor ózgeristerdiń katalızatory boldy. Al búginde bul róldi «Bir beldeý – Bir jol» jobasy atqaryp otyr. Ony alǵash ret Qytaı Halyq Respýblıkasynyń tóraǵasy Sı Tszınpın myrza 2013 jyly Astanada jarııalaǵan.
– Bizdiń elder saýda-ekonomıka, kólik-logıstıka salalarynda aýqymdy jobalardy júzege asyryp jatyr. Alaıda, bir-birimizdi jaqynyraq tanýǵa múmkindik beretin ortaq aqparattyq jáne mádenı keńistik qurý da sondaı mańyzdy, – dedi Raýshan Qajybaeva, BAQ-tyń qoǵamdyq kóńil-kúıdi qalyptastyrýda, jańa ıdeıalarmen jáne qundylyqtarmen almasýdaǵy mańyzdy róline nazar aýdara otyryp.
Osy turǵyda Kazinform Qytaıdyń áleýmettik jelilerindegi belsendiligin arttyryp keledi. Agenttiktiń Weibo jáne WeChat platformalaryndaǵy resmı akkaýnttary Qazaqstan jańalyqtaryn jedel ári tıimdi taratýǵa, ony keń aýdıtorııaǵa qoljetimdi etýge múmkindik beredi.
– Jaqynda Astanada ótken «Ortalyq Azııa – Qytaı» ekinshi sammıti óńirimizdiń elderi men Qytaı arasyndaǵy qatynastardy damytýǵa strategııalyq baǵyt berip otyr. Aqparat quraldarynyń mindeti – osy bastamalardy aqparattyq keńistikte qoldap, ilgeriletý. Bul óz kezeginde elderimiz arasyndaǵy jan-jaqty strategııalyq áriptestikti nyǵaıtýǵa yqpal etedi, – dedi Raýshan Qajybaeva.
«Sınhýa» aqparat agenttiginiń bas dırektory Fý Hýa Qytaı men Ortalyq Azııanyń bes memleketiniń aqparat quraldary arasyndaǵy yntymaqtastyq nátıjelerin joǵary baǵalap, bul ózara túsinistik pen halyqtar arasyndaǵy dostyqty tereńdetýge yqpal etetinin atap ótti.
– Osy forýmdaǵy múmkindikti paıdalanyp, yntymaqtastyqty talqylaı alamyz, Qytaı men Ortalyq Azııa aqparat agenttikteriniń únin búkil álem estýi úshin damý baǵyttaryn birlese josparlap, kúsh-jigerimizdi biriktire alamyz. Bul ortaq taǵdyr qaýymdastyǵyn qurýǵa aqparat agenttikteri qosa alatyn úlesti arttyrady, – dedi Fý Hýa.
Onyń aıtýynsha, ózara is-qımyldy nyǵaıtý maqsatynda «Sınhýa» Jahandyq Ońtústik elderiniń BAQ jáne saraptamalyq ortalyqtary arasyndaǵy áriptestik baǵdarlamasyn ázirlegen.
– Biz Jahandyq Ońtústik elderiniń, sonyń ishinde Ortalyq Azııa memleketteriniń BAQ, saraptamalyq ortalyqtary, memlekettik mekemeleri, kompanııalary men joǵary oqý oryndarynyń túrli saladaǵy praktıkalyq yntymaqtastyǵyn ilgeriletýge belsendi qatysady dep úmittenemiz, – dedi «Sınhýa» aqparat agenttiginiń Bas dırektory.
Sonymen birge, dıalog alańynda Qyrǵyzstannyń «Kabar», Tájikstannyń «Hovar», Túrikmenstannyń «Medıa-Týrkmen» jáne Ózbekstannyń Memlekettik aqparat agenttikteriniń basshylary sóz sóıledi.
Taraptar ekijaqty jáne kópjaqty gýmanıtarlyq baılanystardy damytý, birlesken jobalardy ilgeriletý, kontent almasý, kadr daıarlaý, BAQ áleýetin nyǵaıtý jáne «Bir beldeý – bir jol» bastamasy aıasynda resýrstardy birlesip paıdalaný máselelerin talqylady.
Forýmǵa qatysýshylar jasandy ıntellekt tehnologııalarynyń qarqyndy damýy jaǵdaıynda kásibı qyzmettegi jańa tásilderge toqtalyp, etıkalyq normalar men joǵary kásibı standarttardy saqtaý qajettigin qoldady.
Kezdesý qorytyndysy boıynsha QR Prezıdenti teleradıokesheni men «Sınhýa» aqparat agenttigi arasynda yntymaqtastyq týraly Memorandýmǵa qol qoıyldy. Qujatta jańalyq kontentimen almasý, birlesken trenıngter men semınarlar ótkizý, mýltımedıalyq ózara is-qımyldyń jańa formattaryn damytý, sondaı-aq aqparatty ulttyq jáne halyqaralyq deńgeıde ilgeriletý kózdelgen.
Aıta keteıik, Prezıdent Ortalyq Azııa – Qytaı aqparat quraldarynyń forýmyna quttyqtaý joldady.