«Ortalyq Azııa – Italııa» sammıti aıasynda Toqaev pen Berdimuhamedov kezdesti

ASTANA. KAZINFORM — Memleket basshysy Túrikmenstan prezıdenti Serdar Berdimuhamedovpen kezdesti, dep habarlaıdy Aqordanyń baspasóz qyzmeti.

Qasym-Jomart Toqaev Túrikmenstan prezıdentine iltıpat bildire otyryp, onyń birinshi «Ortalyq Azııa — Italııa» sammıtine qatysýy memleketaralyq kópqyrly qarym-qatynastardy odan ári ilgeriletý turǵysynan mańyzdy ekenin atap ótti.

— Eki el arasyndaǵy yntymaqtastyqty damytýǵa basa mán beremiz. Ekonomıkalyq baılanystarda naqty nátıjelerge qol jetkizemiz dep esepteımin. Basqa da salalar boıynsha, ásirese, mádenı-gýmanıtarlyq baǵytta yqpaldastyq qarqyndy damyp keledi. Kún tártibindegi jobalardy júzege asyrýǵa qos tarap ta kúsh jumyldyratynyn eskersek, ózara tıimdi qarym-qatynastyń keleshegi zor, — dedi Memleket basshysy.

Prezıdenttiń pikirinshe, qazir Astana men Ashhabad arasyndaǵy yntymaqtastyq órkendep, kóptegen negizgi salalarda oń dınamıka baıqalady.

Serdar Berdimuhamedov Qasym-Jomart Toqaevqa qonaqjaılyq tanytqany jáne «Ortalyq Azııa — Italııa» sammıtin tabysty ótkizgeni úshin alǵys aıtty.

— Ortalyq Azııa elderi men Italııa joǵary deńgeıdegi osyndaı formatta tuńǵysh ret kelissóz júrgizip otyr. Sammıt qorytyndysy memleketterimiz arasyndaǵy yntymaqtastyqty keńeıtýge yqpal etetinine senimdimin, — dedi Túrikmenstan prezıdenti.

Kezdesýde Qasym-Jomart Toqaev Halk Maslahatynyń Tóraǵasy Gýrbangýly Berdimuhamedovke ystyq yqylasyn joldap, onyń jaýapty qyzmetine tolaǵaı tabys tiledi.