Ortalyq Azııa ǵalymdaryna arnalǵan tsıfrlyq platforma ázirlendi
ASTANA. KAZINFORM — Qazaqstanda Ortalyq Azııa ǵalymdarynyń klımattyń ózgerýine qatysty zertteýlerin biriktiretin tsıfrlyq platforma ázirlendi. Endi oǵan óńirdegi ózge elderdiń ǵalymdaryn qosý josparlanyp otyr.
Bul týraly «Jasyl akademııa» ǵylymı-bilim berý ortalyǵynyń jetekshisi, ekonomıka ǵylymdarynyń doktory Baqyt Esekına aıtty.
Ol Astanada ótken «Ortalyq Azııa elderin turaqty damytýǵa arnalǵan ǵylym, derekter jáne boljaý» halyqaralyq konferentsııasynda jobanyń múmkindikterine toqtaldy.
— Platformanyń tujyrymdamasyn bıyl sáýirde ótken óńirlik ekologııalyq sammıtte tanystyrdyq. Búgin Ortalyq Azııa elderinen kelgen ǵalymdardy osy jobaǵa qatysýǵa shaqyryp otyrmyz. Klımattyń ózgerýi kóptegen salaǵa áser etedi. Sondyqtan bul máseleni jekelegen elderdiń nemese ǵylymı uıymdardyń kúshimen sheshý qıyn. Ǵalymdardyń zertteýlerin biriktirip, tıimdi tehnologııalardy ortaq paıdalanýǵa múmkindik jasaýymyz kerek, — dedi Baqyt Esekına.
Platformada metan shyǵaryndylaryn azaıtý, bıootyn óndirý jáne kásiporyndardan bólinetin zııandy zattardy baqylaý baǵytyndaǵy ǵylymı jobalar usynylady. Ǵalymdar óz zertteýlerin jarııalap qana qoımaı, olardy júzege asyrýǵa múddeli ınvestorlarmen de baılanys ornata alady.
— Qazir Astana Hub-pen jáne Ortalyq Azııa ýnıversıtetimen kelisim jasalǵan. Platforma BUU-nyń Klımattyń ózgerýi jónindegi negizdemelik konventsııasynyń saıtynda jarııalandy. Endigi mindet — oǵan Qazaqstan men kórshiles elderdiń ǵylymı uıymdaryn qosý. Bul jumysqa Astana Hub kómektesedi, — dedi spıker.
Onyń aıtýynsha, búgingi tańda platforma aıasynda eki pılottyq joba ázirlengen.
— Birinshisi — Qonaev atyndaǵy Taý-ken isi ınstıtýtynyń taý-ken óndirisindegi zııandy shyǵaryndylardy baqylaýdy jetildirýge arnalǵan zertteýi. Ekinshisi — Soda AI kompanııasynyń kómirtekti eginshilikke qajetti bıootyn óndirý tehnologııasy, — dedi ol.
Professordyń pikirinshe, ǵylym, bıznes jáne halyqaralyq uıymdardyń birlesken jumysy klımattyń ózgerýine beıimdelýge arnalǵan jańa tehnologııalardy tájirıbege engizýge múmkindik beredi.
Aıta keteıik, buǵan deıin Qazaqstanda 2024–2026 jyldary ǵylym salasyn qarjylandyrýǵa 730,6 mıllıard teńge bólingeni habarlandy.
