Ortalyq Azııa elderiniń sý vedomstvolary Shardara sý qoımasyna qatysty kelisimge keldi
ASTANA. KAZINFORM — Ashhabad qalasynda Memleketaralyq sý sharýashylyǵyn úılestirý komıssııasynyń (MSShÚK) 91-otyrysy ótti. Bul týraly Sý resýrstary jáne ırrıgatsııa mınıstrligi málim etti.
Jıynǵa Túrikmenstannyń Sý sharýashylyǵy memlekettik komıtetiniń tóraǵasy Dýrdy Gendjıev, QR Sý resýrstary jáne ırrıgatsııa mınıstri Nurjan Nurjigitov, Ózbekstan Respýblıkasynyń Sý sharýashylyǵy mınıstri Shavkat Hamraev jáne Tájikstan Respýblıkasynyń Energetıka jáne sý resýrstary birinshi orynbasary Djamshed Shodı Shoımzoda qatysqa.
Baqylaýshy retinde Qyrǵyz Respýblıkasynyń Túrikmenstandaǵy Elshiliginiń keńesshisi Emıl Shadyhanov qatysty. Otyrysta taraptar 2025 jylǵy vegetatsııa kezeńiniń qorytyndylaryn talqylady. Sondaı-aq 2025-2026 jyldardaǵy vegetatsııaaralyq kezeńge arnalǵan Naryn-Syrdarııa sý qoımalary kaskadynyń boljamdyq jumys kestesi bekitildi. Osy kestege sáıkes Shardara sý qoımasyna keletin boljamdy sý kólemi kelisildi. Budan bólek, taraptar Araldy qutqarý halyqaralyq qorynyń negizin qalaýshy memleketter basshylarynyń sammıtterinde berilgen tapsyrmalardyń oryndalý barysy týraly esep berdi. Memleketaralyq sý sharýashylyǵyn úılestirý komıssııasynyń kelesi, 92-otyrysy kelesi jyly Tájikstanda ótedi.
– Ótken sýarý maýsymy kúrdeli klımattyq jaǵdaıda ótti. Alaıda MSShÚK quramyndaǵy memleketterdiń ózara úılesimdi árekettesýi vegetatsııa kezeńin turaqty ótkizýge múmkindik berdi. Osyndaı kezdesýler arqyly ortaq kelisimder jasalyp, aldaǵy yntymaqtastyqtyń negizi qalanady. Ortalyq Azııa elderindegi áriptesterimizben birge transshekaralyq sý resýrstaryn barlyq taraptyń múddesin eskere otyryp, ádil bólýge nıettimiz, – dedi QR Sý resýrstary jáne ırrıgatsııa mınıstri Nurjan Nurjigitov.
Eske sala keteıik, buǵan deıin qazaq ǵalymdary qubyrsyz sý tartý tehnologııasyn synaqtan ótkizip jatqanyn jazǵan edik.