Ortalyq Azııa elderiniń pedagogteri Nókiste bas qosty — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Iranda jańa iri gaz ken orny ashyldy — «Eurasia Today» aqparat agentti
Irannyń Fars provıntsııasynyń ońtústiginde ornalasqan Pazan ken ornynda aıtarlyqtaı gaz jáne munaı qory ashyldy, dep habarlaıdy Qyrǵyzstanda shyǵatyn «Eurasia Today» aqparat agenttigi.
«Eurasia Today» habarlaýy boıynsha, bul týraly Irannyń Munaı mınıstri Mohsen Paknejad jarııa etti.
Mohsen Paknejadtiń málimetinshe, Fars provıntsııasynyń ońtústigindegi Pazan ken orny aımaǵynda jáne Býsher provıntsııasynyń soltústigine deıingi aýmaqta júrgizilgen barlaý jumystarynyń nátıjesinde jańa qorlar anyqtalǵan.
«Eurasia Today» aqparat agenttiniń dereginshe, gaz qory 10 trıllıon tekshe fýtty (shamamen 283 mıllıard tekshe metr) quraıtyn bul ken orny aldaǵy jyldary eldiń energııa tapshylyǵyn óteýde mańyzdy ról atqara alady.
Aıta ketý kerek, bul jolǵy júrgizilgen barlaý jumystary Irannyń jalpy dáleldengen gaz qoryn 10 trıllıon kýb fýtqa arttyrdy.
Qytaı lokomotıvteri Qazaqstanǵa eksporttaldy — «Halyq gazeti»
27 qyrkúıekte Shyńjańnyń Temengýan qalasynda ornalasqan Xinjiang Tiancheng Agricultural Machinery Manufacturing kompanııasynyń ıntellektýaldy bıdaı uryǵyn sebetin 15 mashınasy tekseristen ótkizilip, júktelip, Qazaqstanǵa sátti jóneltildi.
Bul kompanııanyń bıylǵy aýyl sharýashylyǵy tehnıkasy men jabdyqtaryn Ortalyq Azııa elderine ekinshi ret eksporttaýy.
Bul týraly osy aptada Qytaıdyń «Halyq gazeti» basylymy habarlady.
Qytaılyq BAQ-tyń málimetinshe, bul joly eksporttalatyn ıntellektýaldy uryq sebý mashınasy avtomatty túrde basqarý, uryqty sebý tereńdigin avtomatty teńsheý, olardyń aralyǵyn ıkemdi retteý, aýyspaly tyńaıtqyshty bir ýaqytta sebýdi aıaqtaı alady. Ásirese Ortalyq Azııadaǵy qurǵaqshylyq pen jartylaı qurǵaqshylyq klımatynyń topyraq sıpattamalaryna beıimdelgen. Osynyń arqasynda bıdaı sebý tıimdiligin 30%-dan astamǵa arttyryp, jergilikti sharýalardyń shyǵyndaryn azaıtýǵa jáne astyq ónimdiligin qamtamasyz etýge edáýir kómektesedi.
Sonymen qatar osy aptada «Halyq gazeti» basylymynda «Gansýdyń Gaotaı aýdanyna Jibek jolyn boılaǵan túıe kerýeni keldi» degen aqparat jaryq kórdi.
Atalǵan BAQ-tyń dereginshe, 2025 jyldyń 9 qazanynda Shyńjańnyń Barkól qazaq avtonomııaly aýdanynan jolǵa shyqqan 33 túıe men 20-dan astam top múshelerinen turatyn shyǵys Tıanshan «Jibek Joly mádenı týrynyń» túıe kerýeni 49 kúndik saparynan keıin Gansý ólkesiniń Gaotaı aýdany ishindegi Jibek jolyndaǵy ejelgi Han jáne Tan mádenı jurtynyń Túıe qalasy ornyna kelip jetti.
Atalǵan BAQ-tyń málimetinshe, serýendep júrgen túıe kerýenin qala turǵyndary men týrısteri qaýmalap, ystyq yqylaspen tamashalady.
Ortalyq Azııa elderiniń pedagogteri Nókiste bas qosty — ÓzA
Nókis qalasynda halyqaralyq deńgeıdegi mańyzdy shara — «Ortalyq Azııa pedagogteri» forýmy bastaldy.
Aımaq elderiniń bilim berý salasynyń ókilderi, muǵalimder, halyqaralyq seriktester men bedeldi sarapshylar bas qosqan jıyn «Ortalyq Azııa muǵalimderi — bir aımaq, bir ún, bir kúsh» degen aıshyqty uran aıasynda ótýde, dep habarlaıdy «ÓzA» aqparat agenttigi.
Habarlamada aıtylǵandaı, forýmda zamanaýı oqytý tehnologııalary men ınnovatsııalyq ádisterdi engizý, tsıfrlyq bilim berýdiń jańa múmkindikteri, ekologııalyq tárbıe men qorshaǵan ortany qorǵaý, sondaı-aq turaqty damý baǵyttary keńinen talqylanýda. Muǵalimder qaýymyna ortaq oı men tájirıbe almasý alańy bolǵan bul jıyn, keleshek bilim júıesiniń jańa baǵdarlaryn aıqyndaýǵa sep bolmaq.
Aıta keteıik, forýmnyń alǵashqy kúni qonaqtar Tahtakópir aýdanyndaǵy «Qara Teran» týrıstik ortalyǵyna arnaıy sapar shekti. Munda mádenı-aǵartýshylyq sharalar, tanymdyq semınarlar uıymdastyrylyp, qatysýshylar qaraqalpaq ulttyq óneriniń ásem úlgilerimen, dástúrli taǵam kórmeleri jáne etnografııalyq qoıylymdarmen tanysty.
Sondaı-aq osy aptada «ÓzA»-da «Hıýada «Kilemder shýaǵy» halyqaralyq kilem kórmesi ótedi» degen taqyryptaǵy aqparat jarııalandy.
Atalǵan basylymnyń dereginshe, Horezm óńiriniń tamasha mekeni sanalatyn Hıýa qalasynda 18–19 qazan kúnderi «Kilemder shýaǵy» halyqaralyq kilem kórmesi ótedi.
Qazirgi ýaqytta osynaý kormege qyzý daıyndyq jumystary júrgizilýde. Atalǵan kórme tek qana respýblıka sheńberinde emes, álemge áıgili kilem toqıtyn mektepterdiń ókilderin de bir alańǵa toǵystyrmaq.
Іs-shara ótetin oryndarda arnaıy pavılondar, kórme zaldary jáne sheberler úshin shyǵarmashylyq sheberhanalar uıymdastyrylýda. Túrli ınteraktıvti baǵdarlamalar, sheberlik sabaqtary men tájirıbelik konferentsııalarǵa daıyndyq júrgizilip jatyr.
Qazaqstan Iranmen birlesken bıznes jobalaryn quptaıdy — ParsToday
Qazaqstannyń Irandaǵy elshisi Qazaqstan Iranmen ekonomıkalyq yntymaqtastyqtyń keńeıýin, birlesken aýyl sharýashylyǵy jáne ónerkásiptik jobalardy damytýdy jáne týrıstik qýattar men zamanaýı tehnologııalardy paıdalanýdy quptaıtynyn aıtty.
Bul týraly osy aptada ParsToday aqparat agenttigi habarlady.
Irandyq BAQ-tyń habarlaýynsha, Qazaqstannyń Tehrandaǵy elshisi Ońtalap Ońalbaev senbi kúni Lorestan oblysy men Qazaqstan arasyndaǵy iskerlik kezdesýge qatysqan. Atalǵan basqosýda O. Ońalbaev Qazaqstanda aýylsharýashylyq jáne tamaq ónerkásibindegi 650-den astam belsendi kompanııa tirkelgen jáne ırandyq kompanııalar osy múmkindikti paıdalanyp, saýda yntymaqtastyǵy men birlesken ınvestıtsııany damytý úshin paıdalana alatynyn tilge tıek etken.
Ol osy sapar úshin jasalǵan úılestirýdi joǵary deńgeıde ekenin aıta otyryp, Iran men Qazaqstannyń saıası qarym-qatynastaryn oń baǵalaǵan. Onyń sózinshe, eki el tek saıası deńgeıde yntymaqtasady, sonymen qatar olardyń ortaq tarıhı jáne órkenıettik tamyry olardyń ekonomıkalyq jáne mádenı qarym-qatynastarynyń damýyna jol ashady.
Jer silkinisinen keıin jabylǵan Irak–Túrkııa qubyrynan munaı tasymaly qaıta bastaldy — TRT
Túrkııa Energetıka jáne tabıǵı resýrstar mınıstri 2023 jylǵy 6 aqpanda Túrkııanyń ońtústiginde bolǵan jer silkinisinen keıin jabylǵan qubyr arqyly aǵynnyń qaıta bastalǵanyn rastady.
Bul týraly Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, Túrkııa Energetıka jáne tabıǵı resýrstar mınıstri Alparslan Baıraktar «Irak-Túrkııa munaı qubyry arqyly munaı tasymaly senbi kúni jergilikti ýaqyt boıynsha tańǵy 7:07–de (0407GMT) qaıta bastalǵan.
Mınıstrdiń aıtýynsha, qubyr 2023 jyldyń 6 aqpanyndaǵy jer silkinisterinen keıin toqtatylǵan bolatyn, al Túrkııanyń memlekettik qubyr operatory «BOTAŞ» ony qazan aıynda qaıta iske qosýǵa daıyndady. Bul týraly mınıstr Baıraktar «Nsosyal» áleýmettik jelisine jazǵan.
Iraktyń resmı jańalyqtar agenttigi «INA» senbi kúni Iraktyń soltústigindegi kúrd aımaqtyq úkimetiniń munaı ken oryndarynan munaı eksporty qaıta bastalǵanyn málimdegen.