Ortalyq Azııa elderiniń ortaq máselelerdi bir platformada sheshýi óte mańyzdy – senator

ASTANA. KAZINFORM – Keıingi ýaqytta Ortalyq Azııa elderi bir platformada jumys isteýge kóńil bólip jatyr. Maqsat – iri darjavalarmen túrli salada terezemizdi teńestirý. 

Bul týraly Parlament Senatynyń Ǵalıasqar Sarybaev Jibek joly telearnasynyń «Jańa ýaqyt» aqparattyq baǵdarlamasynda aıtty. 

– Biz Ózbekstanmen tarıhymyz bir elmiz. Burynnan qalyptasqan áriptestigimiz ben yntymaqtastyǵymyz bar. Sol sebepti Táýelsizdik alǵan sátten bastap eń aldymen Qazaqstan men Ózbekstan arasyndaǵy Dostyq shartyna qol qoıdyq. Osy dostyq shartynyń negizinde keıin Strategııalyq áriptestik týraly kelisim qabyldadyq. 2022 jyly biz eki el arasynda «Odaqtastyq yntymaqtastyq týraly» shartqa qol qoıdyq. Osy kelisimderdiń jalǵasy retinde 2024 jyly Qazaqstan men Ózbekstan arasynda áriptestik jáne odaqtastyq týraly baǵdarlama qabyldadyq. Bul baǵdarlama 2034 jylǵa deıin josparlanǵan, - deıdi senator.

Depýtat eki el arasyndaǵy sheshilmegen máselelerge de toqtaldy.

– Eki el arasynda sheshilmegen másele joq dep aıta almaımyz. Biraq shekara máselesi sheshilgen, sanktsııalar joq, bir-birimizge senimmen qaraımyz. Aldaǵy 10 jyldyqta sheshetin ortaq problemalar da bar: transshekaralyq sý resýrstary, ekologııa, ásirese Aral máselesi. Bul tek bir eldiń máselesi emes – Ózbekstanǵa da, Qyrǵyzstanǵa da, jalpy barlyq kórshilerge ortaq. Qaýipsizdik máselesine kelsek, Ortalyq Azııaǵa túrli elderdiń qyzyǵýshylyǵy artqan kezde óz qaýipsizdigimizdi qamtamasyz etetin áleýetti kúsheıtý mańyzdy. Azyq-túlik, aqparattyq qaýipsizdik te osy qatarda, - deıdi spıker.

Ǵalıasqar Sarybaev aımaqtyq saıasat pen Qazaqstannyń dıplomatııalyq baǵytyn túsindirdi.

– Búgingi tańda álemdik saıasatta Qazaqstannyń orny kúsheıip keledi. Bir ǵana mysal: Memleket basshymyz úsh aıdyń ishinde AQSh, Qytaı, Reseı sııaqty iri derjavalarǵa baryp, olardyń basshylarymen mańyzdy kelisimderge qol jetkizdi. Bul – Prezıdentimizdiń dıplomatııadaǵy úlken saıasatker ekenin kórsetedi. Sonymen qatar «S5+1» formaty da búkil álemniń nazarynda. Qazir birde-bir memleket iri derjavalarmen jeke dara básekelese almaıdy. Sondyqtan Ortalyq Azııa elderiniń birlesýi, ortaq máselelerdi bir platformada sheshýi óte mańyzdy, - dedi Ǵalıasqar Sarybaev. 

Senator Ortalyq Azııadaǵy Ózbekstannyń rólin erekshe atap ótti.

– Ózbekstan – Ortalyq Azııanyń ortasynda ornalasqan, aımaqtyń «júregi» sanalatyn memleket. Ol Qazaqstan, Qyrǵyzstan, Tájikstan, Túrkimenstan jáne Aýǵanstanmen shekaralas. Bizdiń maqsatymyz – áleýeti tómen nemese halqy az elderge qysym kórsetý emes, bárimizdiń terezemiz teń dárejede jumys isteý. Ózbekstan qazirgi tańda ınvestıtsııa tartýdy, kásipkerlikti damytýdy, ındýstrııalanýdy basty maqsat etip otyr. Qazaqstannyń da baǵyty osyǵan uqsas: biz de ınvestıtsııany kóbeıtip, ekonomıkamyzdy kóterip, bıznesti damytýǵa kúsh salyp jatyrmyz. Eki el arasyndaǵy taýar aınalymynyń ósýi — osy jumystardyń aıqyn nátıjesi. Meniń oıymsha, aldaǵy ýaqytta bul protsess Ortalyq Azııanyń damýyna eleýli úles qosady, - dedi ol.

Aıta keteıik, Ortalyq Azııa jáne Ázerbaıjan memleketteriniń basshylary Islam órkenıeti ortalyǵyn aralady.