Ortalyq Azııa elderiniń birlesken telearnasy qurylady – Medıaforým
ASTANA. KAZINFORM – 16-17 sáýir kúnderi Ortalyq Azııa boıynsha medıa salasynyń mamandary Astanada bas qosady. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.
Bıylǵy forým «Jahandyq ózgerister dáýirindegi Ortalyq Azııa. Strategııalyq damý quraly retindegi medıa» dep atalady.
Eki kún boıy paneldik sessııalarda Ortalyq Azııa elderiniń aqparat quraldary úshin jańa damý múmkindikteri men yntymaqtastyq máseleleri, jahandyq medıanyń damýy, bolashaqtyń aqparattyq keńistigin qalyptastyrý, JI jáne kóp derek kezeńindegi medıanyń tsıfrlyq transformatsııasy, sondaı-aq el ımıdjin qalyptastyrýdaǵy áleýmettik jelilerdiń róli talqylanady.
QR Mádenıet jáne aqparat mınıstri Aıda Balaeva Ortalyq Azııa qazirgi ýaqytta Eýropa men Azııa arasyndaǵy senimdi kópir ári tranzıttik hab retinde ǵana emes, zor ınvestıtsııalyq, saýda-ekonomıkalyq, týrıstik jáne mádenı-gýmanıtarlyq áleýeti bar aýqymdy ortalyq retinde qarastyrylatynyn atap ótti.
− Ortalyq Azııa kóshbasshylary deńgeıinde aqparattyq saladaǵy yntymaqtastyqty jandandyrý máselesi birneshe ret talqylanǵany málim. Byltyr Astanada ótken konsýltatıvti kezdesýde Prezıdent Qasym-Jomart Toqaev birlesken medıaónimderdi jasaý bastamasyn kóterdi. Qazaqstan Ortalyq Azııanyń ortaq telearnasyn qurý jáne aımaqtyq áleýetti osy aýmaqta turatyn halyqtardyń dostyǵy men birligi týraly habardar etetin telejobalardy jáne halyqtarymyzdyń tarıhı mán-ereksheligi týraly tanymdyq teleradıobaǵdarlamalar toptamasyn daıyndaý ıdeıasyn qoldady. Búgingi kezdesýimizde osy máselege muqııat toqtalyp, Silk Way telearnasynyń jumysyna birlesken kontent daıyndaý boıynsha naqty sheshimderdi qabyldadyq, − dedi mınıstr forýmnyń ashylý saltanatynda.
Osylaısha qazirgi ýaqytta Ortalyq Azııa elderi óńirdegi aqparattyq yntymaqtastyqty nyǵaıtýǵa baǵyttalǵan birlesken telearna men óńirlik medıaplatformany iske qosý múmkindigin qarastyryp jatyr.