Ortalyq Azııa elderi jer degradatsııasyna qarsy birlesken sharalardy talqylaıdy
ASTANA. KAZINFORM — Bıyl 22-24 sáýir aralyǵynda Astana qalasynda Ortalyq Azııa elderi men basqa memleketterdi klımattyń ózgerýi, sý resýrstarynyń tozýy, tabıǵı resýrstardy turaqty basqarý jáne basqa da ózekti ekologııalyq máselelerdi sheshý úshin biriktirýge baǵyttalǵan Óńirlik ekologııalyq sammıt (RES 2026) — halyqaralyq is-sharasy ótedi. Bul týraly AShM málim etti.
Qazaqstan Respýblıkasynyń Prezıdenti Qasym-Jomart Toqaev RES 2026-ny BUU-men áriptestik aıasynda ótkizý bastamasyn 2023 jyly BUU Bas Assambleıasynyń 78-sessııasynda jarııalaǵan bolatyn.
Sammıtke memleketter, halyqaralyq uıymdar, bıznes jáne ǵylym ókilderinen turatyn 1500 delegattyń qatysýy kútiledi.
Onda klımatqa beıimdelgen jer paıdalaný máselelerine erekshe nazar aýdarylady.
Ortalyq Azııa elderinde jerdiń qunsyzdanýy eń ózekti ekologııalyq qaýipterdiń biri bolyp qala beredi.
Osyǵan baılanysty Qazaqstan Respýblıkasy Aýyl sharýashylyǵy mınıstrligi «Jasyl Damý» AQ jáne «Jerlerge zerttep-qaraý jumystaryn júrgizý memlekettik ınstıtýtymen» birlesip, jerdiń degradatsııasyna qarsy kúres, topyraqty qalpyna keltirý jáne kómirtekti aýyl sharýashylyǵyn damytý salalarynda Ortalyq Azııa elderiniń yntymaqtastyǵyn nyǵaıtýǵa arnalǵan arnaıy paneldik sessııa ótkizýdi josparlap otyr.
— Ortaq tájirıbe almasý jer resýrstaryn basqarýda biryńǵaı tásilderdi qalyptastyrýǵa, úzdik tájirıbelerdi taratýǵa jáne Qazaqstannyń klımattyq turaqtylyq salasyndaǵy óńirlik ortalyq retindegi rólin kúsheıtýge múmkindik beredi, — delingen habarlamada.
Sammıt aıasynda Ortalyq Azııa elderiniń memlekettik organdarynyń jerdiń degradatsııasyna qarsy is-qımyl, topyraqty qalpyna keltirý jáne kómirtekti aýyl sharýashylyǵyn damytý máseleleri boıynsha Birlesken málimdemesin qabyldaý kózdelip otyr.
QR AShM Jer resýrstaryn basqarý komıteti Birlesken málimdeme jobasyn ázirledi, ol jaqyn ýaqytta Ortalyq Azııa elderiniń qaraýyna joldanatyn bolady.
Qujat óńirlik úılestirý men birlesken bastamalardy iske asyrýdyń negizine aınalady dep kútiledi.
Aıta keteıik, Qazaqstanda ekologııa salasyndaǵy jańa standarttar bekitildi.