Ortalyq Azııa elderi jazǵy maýsymnyń basyna sýarmaly sý berý kestelerin bekitti
ASTANA. KAZINFORM — Ózbekstan astanasy Tashkentte — Qazaqstan, Qyrǵyzstan jáne Ózbekstannyń sý-energetıka salalary basshylarynyń kelissózderi aıaqtaldy. Kezdesýdiń basty qorytyndysy úshjaqty hattamaǵa qol qoıý boldy.
Energetıka mınıstrligi baspasóz qyzmetiniń málim etkenindeı, qujatta aldaǵy eki aıǵa arnalǵan Toqtoǵul sý qoımasynan sý jiberýdiń kelisilgen kólemderi men rejımderi bekitildi.
Qazaqstan delegatsııasyn kelissózderde Energetıka mınıstri Erlan Aqkenjenov pen Sý resýrstary jáne ırrıgatsııa mınıstri Nurjan Nurjigitov bastap bardy. Áriptes elder tarapynan jumys kezdesýine Qyrǵyzstannyń energetıka mınıstri Taalaıbek Ibraev, Ózbekstannyń energetıka mınıstri Jýrabek Mırzamahmýdov jáne Ózbekstannyń sý sharýashylyǵy mınıstri Shavkat Hamraev qatysty.
— Vegetatsııalyq kezeńde ońtústik óńirlerdi jetkilikti ylǵal kólemimen qamtamasyz etý kún tártibindegi negizgi másele boldy. Hattamaǵa qol qoıý Toqtoǵul SES-inen sý jiberý kesteleriniń saqtalýyna kepildik beredi jáne maýsym basyndaǵy agrarshylar úshin belgisizdikti joıady. Bul qazaqstandyq jáne ózbekstandyq fermerlerge sýarý jumystarynyń bastapqy kezeńin kedergisiz ári turaqty ótkizýge múmkindik beredi, — delingen habarlamada.
Agrarlyq maýsym sońyna deıin turaqty sýmen jabdyqtaýdy qamtamasyz etý úshin elder kezeń-kezeńimen áreket etýge ýaǵdalasty. Vedomstvo basshylarynyń kelesi oflaın kezdesýi maýsym aıynyń ortasynda Bishkekte ótedi. Onda shilde, tamyz jáne qyrkúıek aılaryna arnalǵan sý jiberý kólemderi men kestelerin túpkilikti kelisip, qol qoıý josparlanyp otyr.
Qol qoıylǵan hattama memleketaralyq sý-energetıkalyq teńgerim tetiginiń joǵary tıimdiligin taǵy bir márte rastady.
Jazǵy sý jiberý kólemderin kelisýge deıin elder maýsymaralyq kezeńde júıeli birlesken jumys júrgizdi. 2025 jylǵy qyrkúıek pen 2026 jylǵy sáýir aralyǵynda Qazaqstan Qyrǵyzstannyń energojúıesine 1 560 mln kVt·saǵattan astam kólemde elektr energııasyn qarsy jetkizý júzege asty.
Bul qadam kórshi elge qys mezgilinde jylytý qajettilikteri úshin sýdy artyq paıdalanbaýǵa jáne Toqtoǵul sý qoımasynyń resýrstaryn búkil makroóńirdiń qazirgi aýyl sharýashylyǵy qajettilikteri úshin saqtap qalýǵa múmkindik berdi.
Buǵan deıin Ortalyq Azııa elderi tabıǵı apattar qaýpin seıiltý júıesin nyǵaıtýǵa ýaǵdalasty.
