Ortalyq Azııa elderi ushý qaýipsizdigi men avıatsııalyq normatıvterdi jetildirý boıynsha sheshim qabyldady
ASTANA. KAZINFORM — Avıatsııa jáne áýe keńistigin paıdalaný jónindegi keńestiń 48-shi sessııasy alǵash ret Tájikstan aýmaǵynda Tájikstan Respýblıkasy Azamattyq avıatsııa agenttiginiń dırektory Habıbýllo Nazarzodanyń tóraǵalyǵymen ótti. Bul týraly Kólik mınıstrligi málim etti.
Іs-shara qatysýshylaryna Tájikstan Respýblıkasynyń Kólik mınıstri Ázim Ibrohım quttyqtaý sóz sóıledi. Qazaqstandyq delegatsııany Qazaqstan Respýblıkasynyń Kólik vıtse-mınıstri Talǵat Lastaev basqardy. Sessııa jumysyna qatysýshy memleketterdiń ókilderi retinde Reseı Federatsııasy Kólik mınıstriniń orynbasary Vladımır Poteshkın, Armenııa Respýblıkasy Aýmaqtyq basqarý jáne ınfraqurylym mınıstriniń orynbasary Armen Sımonıan, Ózbekstan Respýblıkasy Azamattyq avıatsııa agenttiginiń dırektory Tahır Nazarov, Belarýs Respýblıkasy Kólik jáne kommýnıkatsııa mınıstrliginiń avıatsııa departamentiniń dırektory Igor Golýba, sondaı-aq Qazaqstan Respýblıkasy Kólik jáne kommýnıkatsııa mınıstrliginiń Memleketaralyq avıatsııa komıteti (MAK) basshylyǵy qatysty.
MAK baıandamasyna sáıkes, 2025 jyly avıatsııalyq jumystar men tasymaldardyń barlyq túrleri boıynsha ushý qaýipsizdiginiń absolıýttik kórsetkishi (31 avıatsııalyq oqıǵa) 2024 jylmen salystyrǵanda (46 avıatsııalyq oqıǵa) aıtarlyqtaı jaqsarǵan.
— Aldyn ala baǵalaý boıynsha, 2025 jyly jumystyń barlyq túrleri boıynsha «adamı faktorǵa» baılanysty avıatsııalyq oqıǵalar shamamen 70%-dy quraıdy. Kelisimge qatysýshy memleketterdiń kommertsııalyq azamattyq avıatsııasyndaǵy avıatsııalyq oqıǵalar men apattar boıynsha ushý qaýipsizdiginiń salystyrmaly kórsetkishteri 2021–2025 jyldar kezeńindegi eń úzdik nátıjeni kórsetti, — dep habarlady vedomstvodan.
Qazaqstan tarapy Ortalyq Azııadaǵy IKAO talaptaryna sáıkes keletin alǵashqy uıym sanalatyn «Kóliktik oqıǵalar men oqys oqıǵalaryn tergep-tekserý ortalyǵy» AQ-nyń damý tujyrymdamasyn tanystyrdy.
Sessııa alańynda Reseı, Tájikstan jáne Ózbekstan ókilderimen ekijaqty kelissózder júrgizildi.
— Keńestiń 48-shi sessııasynyń qorytyndysy boıynsha qatysýshy memleketterdiń yntymaqtastyǵyn odan ári damytýǵa, ushý qaýipsizdigi deńgeıin arttyrýǵa jáne azamattyq avıatsııa salasyndaǵy normatıvtik-quqyqtyq bazany jetildirýge baǵyttalǵan sheshimder qabyldandy, — delingen habarlamada.
Memleketaralyq avıatsııa komıteti (budan ári — MAK) postkeńestik memleketterdiń azamattyq avıatsııa salasyndaǵy qyzmetin úılestirý úshin 1991 jylǵy Azamattyq avıatsııa jáne áýe keńistigin paıdalaný týraly úkimetaralyq Kelisimniń (budan ári — Kelisim) negizinde qurylǵan.
MAK — Kelisimdi is júzinde iske asyrýdy júzege asyratyn, avıatsııa jáne áýe keńistigin paıdalaný jónindegi Keńestiń (budan ári — Keńes) jumysyn jáne onyń sheshimderiniń oryndalýyn qamtamasyz etetin turaqty jumys isteıtin memleketaralyq atqarýshy organ bolyp tabylady. Kelisimge qatysýshy memleketter ózderiniń ókiletti ókilderi arqyly MAK jumysyna qatysady jáne onyń qyzmetin baqylaýdy júzege asyrady.
2026 jylǵy sáýirdegi jaǵdaı boıynsha Kelisimge qatysýshy memleketter: Ázerbaıjan Respýblıkasy, Armenııa Respýblıkasy, Belarýs Respýblıkasy, Qazaqstan Respýblıkasy, Qyrǵyz Respýblıkasy, Reseı Federatsııasy, Tájikstan Respýblıkasy, Túrkmenstan jáne Ózbekstan Respýblıkasy.
Aıta keteıik, bıyl birqatar áýejaıda ushý qaýipsizdigin jetildirý jumystary iske asady.
