Ortalyq Azııa elderi transshekaralyq sýdy bólý men Aral teńizin saqtaý máselesin talqylady
ASTANA. KAZINFORM – Memleketaralyq sý sharýashylyǵyn úılestirý komıssııasynyń otyrysynda Ortalyq Azııa elderi transshekaralyq sýdy bólý men Aral teńizin saqtaý máselesin talqylady. Bul týraly Sý resýrstary jáne ırrıgatsııa mınıstrligi málim etti.
Qazaqstanda Ortalyq Azııanyń Memleketaralyq sý sharýashylyǵyn úılestirý komıssııasynyń (MSShÚK) 90-shy otyrysy ótti. Іs-sharaǵa Premer-mınıstrdiń orynbasary Qanat Bozymbaev, Sý resýrstary jáne ırrıgatsııa mınıstri Nurjan Nurjigitov, Tájikstan Energetıka jáne sý resýrstary mınıstriniń birinshi orynbasary Djamshed Shoımzoda, Túrikmenstan Sý sharýashylyǵy memlekettik komıtetiniń tóraǵasy Dýrdy Gendjıev, Ózbekstan Sý sharýashylyǵy mınıstri Shavkat Hamraev, sondaı-aq baqylaýshy retinde Qazaqstandaǵy Qyrǵyzstannyń Tótenshe jáne ókiletti elshisi Dastan Dıýshekeev qatysty.
Taraptar bıylǵy vegetatsııalyq kezeńde Ámýdarııa jáne Syrdarııa ózenderi basseınderindegi sý qoımalarynyń lımıtteri men jumys rejımin talqylady. Sondaı-aq memleket basshylary – Araldy qutqarý halyqaralyq qorynyń quryltaıshylary belgilegen mindetterdi júzege asyrý boıynsha atqarylyp jatqan jumystar da sóz boldy.
Byltyr uıymǵa tóraǵalyq etý quqyǵy Qazaqstan Respýblıkasyna ótkenin eske sala keteıik. Sondaı-aq Ortalyq Azııadaǵy sý qaýipsizdigin qamtamasyz etý máselesine arnalǵan pikirtalas ótti. Oǵan Dúnıejúzilik bank, Azııa damý banki, German halyqaralyq yntymaqtastyq qoǵamy (GIZ) jáne Shveıtsarııanyń damý jáne yntymaqtastyq agenttigi (SDC) sııaqty halyqaralyq uıymdar men qarjy ınstıtýttarynyń ókilderi qatysty.
– MSShÚK óńir úshin ózekti sý máselelerin talqylaıtyn mańyzdy alańǵa aınaldy. Sońǵy eki jylda Qazaqstannyń Ortalyq Azııa elderimen sý resýrstaryn basqarý salasyndaǵy ózara is-qımyly aıtarlyqtaı kúsheıdi. Sý dıplomatııasy jalpy sý qaýipsizdigin qamtamasyz etýde negizgi ról atqarady, sondyqtan biz ózara tıimdi yntymaqtastyqty nyǵaıtyp, óńir aldynda turǵan syn-qaterlerge birge qarsy turýǵa nıettimiz. Sońǵy jyldary atqarylǵan jumystar bul baǵyttyń durystyǵyn kórsetip otyr, – dedi Sý resýrstary jáne ırrıgatsııa mınıstri Nurjan Nurjigitov. Memleketaralyq sý sharýashylyǵyn úılestirý komıssııasynyń 91-shi otyrysy bıyl kúzde Túrikmenstanda ótedi.
Eske sala keteıik, buǵan deıin osy jıynda Qanat Bozymbaev Ortalyq Azııa elderin klımattyq syn-qater jaǵdaıynda sýdy ádil bólýge shaqyrǵanyn jazǵan edik.